A inah Delhi CM beih a ni, a tituin thubuai nei ngah sa

Delhi Chief Minister Rekha Gupta-i’n New Delhi-a a chenna ina Nilainia ‘Jan Sunwai’ a hman laia beitu chu man a nih hnuah ‘dan bawhchhe lian tak’ tia sawi niin a hma pawhin thubuai eng emaw zat a lo nei tawh tih hriat a ni.
Thuneitute chuan chief minister beitu nia puha an man hian Gujarat-a Rajkot-ah thubuai a nei sa nual tih an sawi niin ANI chuan a tar lang a. Gupta-i hi Nilaini zing khan Civil Lines-a a chenna inah beih a ni.
A titu nia puh hi kum 41 mi mipa, Sakriya Rajeshbhai Khimjibhai-a niin Rajkot-a cheng a ni a, a thiltih hnu lawkah hian Delhi Police-in an man zui.
A lakah hian ‘tualthah tum’ thubuai bakah Bharatiya Nyaya Sanhita (BNS) Section 109(1) tlawhchhanin thubuai siam a ni bawk.
Rajesh Khimji-a hian a hmain Indian Penal Code (IPC) tlawhchhana a laka thubuai siam a lo nei nual tawh a. Hengte hi hmanraw hlauhawm, mi dang tina thei hmanga chetna leh mi tibuaia muanna tichhe zawnga khawsak te pawh a tel tih thuneitute chuan an sawi.
Heng bakah hian phal lova zu kawl avangin man leh thubuai siamsak a lo ni tawh bawk niin ANI chuan a tar lang.
Rajesh Khimji-a lakah hian a vawi khat nan kum 2017 khan Rajkot-a Bhaktinagar Police Station-ah FIR thehluh a ni a, hemi tum hian IPC Section 326, 504 leh 114 tlawhchhana thubuai siamsak a ni a. November, 2019 khan Rajkot-a court-in thiam chantirin a chhuah.
Gujarat Prohibition Act tlawhchhanin vawi li thubuai siamsak zui a ni a, heng paliah hian court-in thiam chantirin a chhuah leh vek thum a, thubuai dang pakhat la neiin hei hi tihkhawtlai mek a ni bawk.
Gujarat Prohibition Act Section 65AA leh 116B tlawhchhanin ruihtheihthil leh zu hralh, lei, kawl leh mi dang hnena hlan chhawng thubuai siamsak a nei a. Hetah pawh hian November, 2023 khan Rajkot-a court-in thiam chantirin chhuah a ni leh bawk.
Rajesh Khimji-a hi heng dan tlawhchhan tho hian Bhaktinagar Police Station-ah man a ni leh a, hetah pawh hian Gujarat court chuan October, 2023 khan thiam chantirin a chhuah leh bawk niin ANI-in a tar lang.
Bhaktinagar Police Station-ah vek hian Gujarat Prohibition Act Section 6PI leh 116B hmangin thubuai a nei mek bawk a, hei hi Additional Civil Judge court chuan a tikhawtlai mek a, thubuai ngaihtuah leh hun atan September 29 hi ruat a ni.
Bhaktinagar Police Station-ah tho hian Rajesh Khimji-a lakah hian IPC Section 324, 323, 504, 114 leh GP Act Section 135(1) tlawhchhanin thubuai siam a ni tawh bawk a. Hetah pawh hian Rajkot court-in December, 2024 khan thiam a chantir leh a ni.