A kir ruala goal khung leh nghal Mbappe

French champion chhuahsan mai tur ang takin season thar inbuatsaihna lamah an captain Kylian Mbappe chuan Paris St-Germain first team squad a zawm lo a, nakum nipui laia a contract hmang zo tawh tur a nih laia contract pawhsei a la hnial zui zel avang leh Ligue 1 season thara an match hma-saber pawh a khelh loh avangin kumin nipui insuan lai hian a chhuah mai rinna a lian hman a, mahse, first team squad-ah kirlehin, karliamta Inrinni khan a team tan khelmual a lut ve leh ta nge nge a, goal a thun leh nghal.
Mualneitu Toulouse nen sikhat ve ve thuna team pahnih inhnehtawk zan hian second half tir lam minute 62-ah Mbappe hian penalty atangin mikhual hmahruaina goal a chhuihlut a, kha kha Ligue 1 goal 165 a khung tlinna chiah a ni nghe nghe.
Toulouse game-ah kum 24 mi France captain hi first half-ah a lut lo leh phawt a, mahse, second half-a khelmual a luh atanga minute 11-ah reigning champion PSG tan a thun a; minute 87-ah home team lamin penalty hlawhchhuak ve lehin, Morocco forward Zakaria Aboukhlal chuan Toulouse siphurh sutna goal a chhuihlut.
Mbappe tan tun kha July ni 21 friendly match hnu lama PSG tana a khelh leh vawikhatna niin, Japan leh South Korea rama pre-season tour-ah a tel ve lo a, league bul an tanna inkhela PSG-in goal awm loa Lorient an inhnehtawkpuina game-ah pawh inkhel entute zingah a thu tluan tawh bawk.