Inrinni zanah singa faia an mikhual Real Betis sawpin Barcelona chuan La Liga table-ah a sangber an luah chho.
Tun kha April 2021 hnu lama Catalan team-in La Liga match khata goal nga an thun leh hmasakber niin, season thara league match nga an khelh tawh-ah tlawm an la nei lo zel.
Nou Camp inkhelah hian Atletico Madrid atanga loan-a an lakluh Portugal forward Joao Felix chuan minute 25-ah goal hma-hruai tilutin, Barcelona tana a goal hmasaber a ni.
Spanish champion tan hian Robert Lewandowski chuan chawlhlawk hmain goal khat dang a thun belh a, second half-ah Ferran Torrres, Raphinha leh Joao Cancelo-te’n goal khat diat diat thawh ve lehin, Barcelona hian khelh ngaa point 13 hmuin table-ah a ler an luah chho a, nizan result tarlan hman loha Real Sociedad hma-chhawn Real Madrid lakah point khatin an sang a, Real hian an mikhual Sociedad laka an result azirin Barca hi an hma-khalh leh thei ang.
Ningani Europa Lea-gue-a Rangers luhkhung tur Betis hian La Liga table-ah pakuana an luah.
A lerah Barcelona an chho
Get real time updates directly on you device, subscribe now.
Prev Post
Next Post