Ronaldo leh Mane goal

On Sep 18, 2023 19 0

Ronaldo leh Mane goal
Saudi Pro League season thara an game hmasa pahnihah Al-Nassr tlawm mah se a hnu lamah a zawnin match li an chak a, kar-tawp Inrinnia an match hnuhnungberah hian Cristiano Ronaldo leh Sadio Mane-te goal thun hmangin Al-Raed lakah 3-1 hnehna an chang leh.
Liverpool forward hlui Mane hian first half hun pekbelhah mikhual hmahruaina goal khung-in, a hnuah Ronaldo solo goal pui tak hmuh tur a awm zui a, ti hian, Portuguese superstar hian Saudi Pro League kal mekah goal sarih thunin league top goal scorer a ni mek a, Mane chuan goal ruk a nei ve tawh bawk.
Kartawp league inkhel dangah Newca-stle United forward hlui Allan Saint-Maximin chuan Al-Taawon laka 3-2-a Al-Ahli chakna goal a thun.
Celtic striker hlui Moussa Dembele pawh-in Inrinnia Al-Ettifaq chakna inkhelah goal a khung a, Steven Ge-rrard-a team enkawl lai Al-Ettifaq hian 3-1-in mualneitu Abha an hneh.
Zirtawpni zan khan Brazil forward Neymar chuan a club thar Al-Hilal tana a game hmasaber khelin Al-Riyadh lakah a team chu 6-1 hnehna a chan-pui a, ti hian, league khelh rukah Al-Hilal hian hma an hruai mek.
Barcelona leh Paris St-Germain striker hlui Neymar hian second half laihawlah bench thawhsanin khelmual a lut a, Al-Hilal goal lina thuntu a chipui Malcom-a goal tur a chhawpsak nghe nghe.
Al-Hilal supporter tam zawk chuan a club thar tana a debut-ah pound maktaduai 77.6-a an lakluh Neymar-a goal thun lai hmuh an inbeisei laiin an goal ngana tur penalty pet loa Salem Aldawsari-a’n a pet laiin Brazilian hi boo khum a ni!