‘A mak mang e, van lalber chu’

Van lalber kha mak a ti a, nuamsa theiin hrehawm tinreng a tuar leh ranthleng leh kraws a thlang kha mak a ti a ni. Chu chu hlain a puang a, chu hla ‘A mak mang e, van lalber chuan’ tih hla chu Zofa Kristiante zinga hre lo an awm kher lo ang.
He hla phuahtu Dr Ramdinthara Sailo hian he hla hi hun engemaw chen a pai a, Gospel Centenary lawm lai vel atangin a pai tawh tiin a sawi theih ang.
Zofate chanchin tha hrilh tura ram hla tak atanga rawn kal missionary-te kha a ngaihtuah a, an ram atanga a hlatzia te, kawnga harsatna an tawh nasat turzia te ngaihtuahin, hrehawm hmachhawn turin an rawn kal a ni, chu chu Pathian an hmangaih vang a ni tih chu a rilrua a thawh dan a ni.
‘Pathian min hmangaihna atanga lo chhuak a ni,’ tiin a ngaihtuah a, Pathianin Isua min pe a, Isua chuan kraws kawng a rawn zawh ta a, chu chu a bul chu a ni tiin, Pathian kan hmangaih avangin a tan kan tuar ve tur a ni, Isua kraws kawng hi kan zawh ve tur a ni a ti ta a ni.
He hla hi 1996 September thlaa a phuah a ni a, “He hla ka phuah hi, chawlhkar khat vel chu niin ka hria,” a ti.
“Ka rilrua a thawh dan kha hla thuin ka dah a, vawi leh khata zo nghal ka ni lo, vawi hnih vawi thum ka bei nawn ang. A thu ka peih hnuah a thluk hi chu ka siam,” tiin ‘A mak mang e, van lalber chuan’ tih hla a peih fel dan a sawi.
“Lal Isua tuarna hi ringtu nunah a bulpui a ni a, Isua vanga Pa hnen thleng thei kan ni,” tiin Lal Isua tuarna a tuipui thu leh a pawimawh thu a sawi a, “He hla innghahna pawh Lal Isua tuarna a ni a. Lal Isua tuarna hi engkim innghahna a ni. Min hmangaih avangin a tuar a, chu chu hmangaihtuina a tih dan tur pawh a ni ang. Keini pawhin Lal Isua kan hmangaih avanga tuar tur kan nei a, ‘sacrifice’ tur kan nei a ni. Chu chu ringtute tan a pawimawh a, chuvangin he hlaah pawh hian ‘Engtia nasa nge i lo tuar ve?’ ka ti a ni,” tiin a chhunzawm a ni.
“Ranthleng leh kraws maw a lo thlan le!” a tih chhan pawh a sawi a, “Isua nun pum pui kha kraws a ni. Ranthlengah khan kraws a intan tawh a, kraws-a khen beh a nih thleng khan, a nun pum kha kraws kawng a ni,” a ti.
“Hmangaihtuin a hmangaihte tan a tuar a, keini pawhin min hmangaihtu tan kan tuar ve tur a ni,” a ti a, rual ute’n Isua tuarna an tuipui thu leh kraws an en thu te, Good Friday pawh an ngaih urhsun thu te sawiin, “Tunlai hi chuan khatiang kha kan ni ta lo deuh em aw, ka ti,” a ti bawk.
Dr Ramdinthara hian kraws kawng a ngaihtuh thin a, a hla pakhat, 2017-a mi pawh ‘Rinnain va chuan ila (Kraws lamtluang)’ tih a ni. Chutah chuan “Kraws lamtluang a va hrang em” a ti a, mahse, “Vanram kawng a lo ni e!” tiin a sawi zawm.
Kristian nih tirh lama hla phuahtute angin Kalvari tlang a thlir ngawih ngawih lo tih a sawi a, mahse he hlaah hian “rinnain va chuan ila” a tih chu “Kalvari tlang lamtluang” a ti.
“Kraws kalkawng hi ka ngaihtuah a, mitthlaah Kalvari tlang lam pana Isuan kraws rit tak mai pua chau taka a kal lai te a lo lang a,” tiin “Dr Ramdinthara Sailo Hlate” tih bu-ah a ziak a, “Lal Isua zuia mahni kraws pua kan kalkawng hi kawng nuam leh awlsam beisei chi a ni lo,” tiin a chhunzawm a ni.