A nihna tur anga NIT sak loh vangin MP-in complaint thehlut

Lengpuia National Institute of Technology hmun din tumnaah a nihna tur anga sak a nih loh avangin complaint a thehlut tih Mizoram MP K Vanlalvena chuan a sawi.
Govt. Lengpui High School chuan an kum 50 tlin, Golden Jubilee chu Ningani khan an lawm a. He hun hmanpuitu Rajya Sabha MP K Vanlalvena chuan cheng vaibelchhe 700 senna tur NIT Lengpui rama sak mek chu tunah vbch. 300 vel an hmang tawh a. A nih tur anga an sak loh avangin complaint a thehlut a, tunah chuan director fel tak dah a ni tawh tih a sawi. Forest clearance tih fel loh avanga buai pawh department hotute nen director general-ah an tifel tawh a, reilote ah NIT building tha tak neih thuai a beisei tih a sawi.
Sawrkar hriatpui damlo emergency-te Lengpui Airport-a tum pui theih loh chungchangah Central Aviation hotu chu GAD Aviation Wing principal consultant Pu J Lalhmingliana nena an zuk dawr tih sawiin, hetiang airport pali dah zingah Lengpui Airport chu a lo tel a, dilna siamin reilote ah sawrkar hriatpui damlo emergency hruai ngaite tan thu lawmawm an hre thuai turah an ngai tih a sawi bawk.
Zirna hlawhtlinna chu zirlai, zirtirtu leh nu leh pate ni mah se, mahni hmalam tana hlawhtlinna tak tak chu zirlaite kutah a awm tih K Vanlalvena hian a sawi a. Tun generation vanneihna chu hmangthiam a, tumruhna nen hlawhtlinna kawng zawh turin duhsakna a hlan tih a sawi a ni.