A Phun aiin a Humhalh

Mizoramin kum tin June ni 11-a kan hman thin Green Mizoram Day hman dan tur relin tun atangin kan hmanhlel chho leh tan ta a. Kumin June ni 11 hi Pathiannia a tlak avangin June ni 9 Zirtawpniah hman tura ruahman a ni a. Green Mizoram Day apianga thing kan phun hi a vai chuan nuai 50 a chuang tawh ang a, a damkhawchhuak hi a zatve vel turah ngai ila, chu chu nuai 25 vel tihna a ni.
Green Mizoram Day hman tan 1999 atanga chhut chuan kumin hi a champha 24-na a ni a, kum 23 chhungin thingphun nuai 25 vel a damkhawchhuak tihna a ni a; mahse, a len dan a indawt chho zut ang a, a puitling chin, kum 10 leng vel chu nuai 20-ah a chhut theih mai awm e.
Hetia kan han chhut deuh duahna chhan chu, heng kum 23 chhunga thing heti zat kan phun nung hi a lawmawm hle mai a, phun lo ta ila, thing nuai 25 vel tona tur chu a awl duai dawn tihna te pawh a ni thei mai ang chu. Thingphun hi a tha a, intihhmuh zel tur a ni a. Tuihna siamtu a ni a, boruak thianghlim siamtu a ni a, nungchate chenna a ni a, thildang tam takah a la tangkai em em bawk a ni.
A nih leh, kum 23 chhunga tlangram lo neih avanga thing kan vah thluk te, kawngpui sialna avanga thing kan nawrthluk zozai te, hmasawnna ruhrel din nana project hrang hrang hnuaia construction avanga thing, ramngaw kan thiah zozaite hi engzat fakau nge ni ta ang?
Tlangram loneih avanga lo pahnih khat leka ramngaw thiahnaah hian thing a nuai tel kan vat thlu thin a, tlangram lo neia eizawngtu hi chhungkaw sang tam tak an ni ang a, kum khata an thing kih thluk tam turzia hi chhut ngam pawh a ni lo.
Thingphun kan buaipui nasat tluk bawk hian thing dingsa humhalh pawh hi kan buaipui tur a ni a; a nihna takah chuan a phun aiin a awmsa humhalh hi a let tam takin kan buaipui zawk tur a ni. Tlangram lo pakhat chauh bansan pawh hian, kum khata kan thingphun let tam tak, a puitling sa lehnghal hi a humhalh tihna a ni.