NGO Coordination Committee chuan January 19 khan Mizoram larsap kaltlangin Union Home minister hnenah memorandum an thehlut a. India leh Myanmar inrina bulhnai, Tiau lui karcheha awmten inpawh tawn taka eizawnna dapna kawngah thleng thlamuang taka nitin an khawsak laiin, 2023 January 10 chawhnu dar 3.30 vel khan Mizoram (India) lamah Myanmar sipai indo thlawhna thlawk lutin bomb a thlak a, January 11 ah pawh bomb hi a rawn thlak nawn leh tih sawiin, hei hian heng laia chengte a ti ralti in indonaa tel ve hauh lo te chunga tharum thawhna a ni a, India rama state ralmuang ber Mizoram ralmuanna a tiderthawng hle tih an sawi a ni.
-- Advertisement --
Myanmar sipaiten an mi beih tumte an beihnaah, a tel ve lo Mizoram/ India lam thleng thlenga tharum thawhna a chelek chu ram leh mipui himna tiderthawngtu, hmunhma leh bungrua intihchhiat sakna a nih bakah India ram zahawmna tihbawrhban leh mihring dikna chanvo palzut sakna a ni tih an sawi.
Myanmar sawrkar sipaiten ram chhung buaina leh helna tukdaih an tum dan chuan a tha lo zawngin nghawng a nei zau zel zawk nia an hriat thu NGO Coordination Committee hian sawiin, a zai zap leh huamzau zawka political party tin, hel pawl tin leh a kaihhnawih zawng zawngte kuahkhawm zawnga hma a lak theih nan India sawrkar chu palai hna thawktu ni turin a ngen tih a sawi bawk.
Khua leh tuite himna leh a ram ralmuanna vawnnun zel nan, an thlavang hauh turin India sawrkar an beisei tih an sawi a.
Myanmar buainaa sawrkar sipaite chet danah mihring dikna chanvo bawhchhiatna nasa tak a awm tih sawiin, khawvela democracy ram lian ber India tan a ram thenawma hetiang thil a thlen reng lai hian a ngawihsan thiang lo, tiin, mihring zahawmna vawnghim a, champion puitu ni ngei turin an beisei tih an sawi a ni.