A rinawm ang em?

Mithiam ten zirchianna an neih atangin i kawppui kha a aw ri (voice pitch) atangin i lakah a rinawm dawn leh dawn loh a hriat lawk theih niin an sawi tlat mai.
Zirchianna neitu te chuan hmeichhia ten an kawppui tur an zawn laiin mipa aw thum leh aw ki hniam te chu rinawm lo deuh zawk turah an ngai tlangpui niin an sawi a, chutihrualin mipa te chuan hmeichhe aw ki sang te chu rinawm lo turah an ngai ve thung niin an sawi bawk.
He zirchianna hi McMaster University-a Department of Psychology, Neuroscience and Behaviour a mithiam te neih a ni a, zirchiannaa an hotu pakhat Jillian O’Connor chuan, “Mipa aw ki hniam deuh chuan hmeichhia a hip zawk a, chutiangin hmeichhe aw ki sang deuhin mipa an hip zawk bawk, mahse, chutiang aw ki nei te chu an kawppui te laka an rinawm lohna chance a sang zawk a ni,” a ti.
He zirchianna atan hian volunteer-te chu mipa aw leh hmeichhe aw ki hrang hrang an record sa te ngaihthlak tir an ni a, chung voice clip te chu a ki sang leh hniam deuh tura khawl hmanga khawih danglam vek a ni, voice clip an ngaihthlak zawh hnua tu te nge an kawppui te laka rinawm lo tura an rin te an zawt leh ta theuh a ni.
Zirchianna-a an hotu he university-a an professor David Feinberg chuan, “Aw ki atanga rinawm leh rinawm lo tura kan lo rin nghal ringawt theihna chhan chu pitch, hormones leh infidelity te hi an inlaichin vang a ni thei ang. Mipa testosterone (testosterone= hormone, mipa ti mipa tu a ni ber awm e) level sang te chu an aw ki a hniam tlangpui a, hmeichhia estrogen (estrogen/oestrogen= hormone, hmeichhia ti hmeichhia tu) level sang te chu an aw ki a sang ve bawk. Testosterone leh estrogen level sang te tan chuan han chet meh ve deuh hlek a awlsam bik riau a ni,” a ti.
He zirchianna chungchang hi journal Evolution Psychology-ah tarlan a ni.