Khawmualpui pasarih a tlangkang pasarih lawn chhuakin record siam

Khawmualpui pasarih a tlangkang pasarih lawn chhuakin record siam
Visakhapatnam a cheng, adventurer Bhupathiraju Anmish Varma chuan ni 92 leh darkar li leh minute 45 chhungin khawmualpui pasarih-ah volcanic summit pasarih nei hmanin, Guinness World Record a siam. He record siam tura a penchhuahna chhan hi sawiin, ramdang tlang lawmmi ten India-in tlan lawn lama record tihtham an la nei lo tia an sawi chu ngai thutakin, chu chuan a chophur ta niin a sawi.
Varma chuan, “An sawi chhuak ve satliah a ni mai a. Mahse, ka pai dai thei lo a. Kum khat chhungin eng emaw tak ka tih ang tiin ka cho ta a ni. Chu ngaihtuahna chu ka zin kawng zawng zawnga min nawr kaltu a ni,” a ti.
Varma hian a expedition hi October ni 23, 2024 khan tanin, Mount Elbrus, Russia a lawn chhuak a, January ni 23, 2025-ah Mount Sidley, Antartica lawn chhuak lehin, record siam nan a hmang ta a ni. Volcanic summit pasarih a neih zingah hian Ojos del Salado, South America, Mount Kilimanjaro, Africa, Mount Damavand, Asia, Pico de Orizaba, North America, Mount Giluwe, Oceania te pawh a tel.
He record siam tur hian khawmualpui pasarih a tlangkang (volcanic) sang tak tak pasarih a lawn chhuah vek a ngai a, Europe, Asia, Africa, Ocenia, North America, South America leh Antartica-a volcanic tlangsang te a lawn chhuak vek a ni.
Varma chuan, “Mountaineering tih hian tlang lawn ringawt a ni lo a, zin kual vak vak a ngai a, hmanraw tha kan mamawh a, support system tha kan mamawh bawk. Chung zawng zawng bakah sum lama puitu zawn kha ka tan chuan a harsa ber a ni,” a ti.
MBA graduate niin, martial arts a thiam bawk a, tlanglawn hi tunhma atanga lo tui tawh niin, Mount Kilimanjaro hi 2020 khan a lo lawn chhuak tawh a, Aconcagua pawh hemi kumah vek hian lawn chhuakin, 2021-ah Mount Everest a lawn chhuak tawh bawk.