A tawpna’n zaninah Nadal vs Djokovic!

A tawpna’n zaninah Nadal vs Djokovic!
Season kal lai tawp ruala professional tennis chawlhsan ve tawh tur Rafael Nadal leh a elpui kumhlun Novak Djokovic ngei mai chu zanin hian khelmuala an inhmachhawn lai hmuh tur a awm leh dawn a, Saudi Arabia rama Six Kings Slam exhibition event kal laiah pathumna an inchuh dawn.
Ningani khan Six Kings Slam exhibition semi-final match pakhat zawkah Nadal hi a chipui Carlos Alcaraz chuan 6-3, 6-3-in a vaw tla a; semi-final lehlamah Djokovic hi Jannik Sinner chuan 6-2, 6-7(0), 6-4-in a hneh ve bawk a, ti chuan, final lut zo lo pahnih Spaniard leh Serb hi third-place match-ah an intawng dawn ta a ni.
Riyadh khaw final-ah world number one Sinner leh Alcaraz an intum ve bawk ang a, a chak zawk zawk chuan US dollar maktaduai 6 an hawn dawn a ni.
Tarlan tak angin, Rafael Nadal vs Novak Djokovic match hi India sanaa zanin, Inrinni zan dar 10-ah an khel tan ang a, India ram tennis fans tan TV lamah live broadcast en tur awm dawn lo mah se DAZN website kaltlangin live streaming thlir tur a awm dawn a ni.
22-time Grand Slam champion Nadal leh Djokovic hi vawi 60 intum tawhin, men’s tennis-a inhmachhawn ngun ber an ni a, tah hian Spaniard vawi 29 chakin, Serb hi vawi 31 a chak thung.
Nadal leh 24-time Grand Slam champion Djokovic inhmachhawn hnuhnunber chu Paris Olympics second round kha niin, Nadal zawk 6-1, 6-4-in a tlawm.
Karliamtaa a chawlh hun tur puang fel Nadal leh Alcaraz hi kumin Paris Games men’s doubles-ah khan an tangdun a, thlathar November ni 19-24 hian Malaga khawpuia Davis Cup Final 8-ah an tangdun leh dawn a ni.