A ti thei zawk chu… tu maw?

Education minister Dr Vanlalthlana chuan Aizawlah zirtirtu inbeng nasa lutuk leh thingtlang lama zirtirtu indaih lohna siam rem tura hma an laknaah, zirtirtu thenkhatin milian leh thiltithei zawkte pun a, insawn lo tura insawipuitir leh nawr an awm thin, tiin tun hnaia Mizoram Hindi Training College (MHTC) in kum 50 tlin lawmna an huaihawt a hmanpuinaah a sawi a.
He thu sawitu hi minister a ni a, ram inrelbawlna thilah, minister chu lal tak leh thu nei tak a ni a, a department chanpualah lek phei chuan a thu ber tura ngaih a ni. Minister zawng zawng chunga awm chu chief minister a ni a. Chief minister hi minister-te portfolio sem leh reshuffle thilah chuan a thu teh meuh mai; mahse, CM hian a hnuaia minister-te chanpual department inrelbawlna khawih danglam theihna a nei ngawt lova, mahse a ngenna erawh minister-te chuan an zahsakin tihpuitlinsak loh ngawt chu an hreh thin ang tih a rin theih mai.
Amaherawh chu, education minister hian ‘milian leh thiltithei zawkte’ tih tawngkam a hman avang hian chief minister ngawr ngawr chu a kawk lo niin a lang. Chuti a nih chuan, ‘milian leh thiltithei zawkte’ chu tute nge ni ta ang, tih hi zawhna pawimawh tak a ni ta a ni.
Dan hnuaia kalnaah chuan, “Dan aia lal awm lo tura ‘ngaih’ a ni” tia sawi tur ni lovin, “Dan aia lal hi an awm lo” tih mai tur a ni. Education department a ni emaw, electricity department a ni emaw, health department a ni emaw, etc., dan/kalphung/system hnuaia kal vek an ni a, chumi pela kal chu dan bawhchhiatna kha a ni mai a. Dan bawhchhe zawnga kal thei, kaltir thei ‘milian leh thiltithei zawkte’ an la awm cheu a nih chuan inenfiah kan ngai hle tihna a ni.
A nihna takah chuan, zirtirtu pakhatin education minister nawr tura tute emaw a tir kal thei a nih tawh chuan, kha zirtirtu kha a tirha te aia thiltithei zawk chu a ni ber awm e. Zirtirtu duh dan tihpuitlin a nih chiah khan, kha zirtirtu kha minister aiin thu a nei zawk a, thil a ti thei zawk tihna a ni daih tawh a ni.
Eng pawh ni se, minister hi thlangra kengtu a ni a, a thu ber. Buh a thlei laiin, buhfai, a hum leh a kem a inthliar hrang tur a ni a, chhawk tur chu chawk thawt thawt zel mai rawh se. Nu berin buh a thlei laiin, “Buhhum kha a laiah dah la, buhkem kha a veilamah…” tu mahin an lo ti chhen thei lo ang hi a ni mai.