A tumpui chibai duh loh vanga ‘boo’ hlawh leh Svitolina

A tumpui chibai duh loh
vanga ‘boo’ hlawh leh Svitolina
Net hrulah Belarusian world number two Aryna Sabalenka chuan chibai turin Ukraine player Elina Svitolina a lo nghak ran a, mahse, Belarus thlawpnaa Russia-in ran ram a run hnua Russian player la chibai leh ta ngai lo Svitolina hian 6-4 6-4-a a hneh loh Sabalenka chibai duh loin a thutna lam a pansan a, French Open fans-in an ‘boo’ khum hluah hluah!
Roland Garros-a Thawhlehni hmeichhe singles quarter-final inkhel boruak tang taka hnehna chang zo ta lo Ukrainian hian inkhel tan hmain a tumpui a chibai loh tur thu a sawichiang tawh a, a thutiamah dingin chibai a pumpelh a; inkhelh banah reporter-te zawhna chhangin Elina Svitolina chuan Sabalenka khan a chetziain mipuiin amah an ‘boo’ theihna turin tan a khawh ru ngei nia a ngaih thu a sawi!
Kum 28 mi Svitolina hian Roland Garros-a a thlen ngai loh thlengin, last eight atanga semi-final luh a tumna erawh a puitlin zo ta lo a; Paris clay-a diriam a hlawh chungchang-ah a tumpui demna chhakchhuakin, “Chibai chungchanga ka dinna a chiang tawk hle tawh chungin min chibai tura a han khawsa vel kha eng ber nge a nghah ka hre lo.
“Boo hlawh kha ka beisei lawk sa a ni tho a, he dinhmunah hian tu pawh ding se ka tawn ang kha an tawn ve tho ka ring a, min barakhaih hran lo,” a ti.
Tarlan tawh thin angin, world number three lai lo ni ve tawh Svitolina hian nikum October thlaa a fa hmasaber Skai a hrin avangin hun engngemawchen a chawl a, tun hi fanu a neih hnua grand slam tournament a khelh leh vawikhatna chauh niin, WTA ranking lamah pawh 192-na daih a ni tawh.
An ram, Ukraine-in run a tawh mek avangin amah mai bakah Ukrainian player-te rilru hi khelmual chhungah pawh a pangkhing hle ang tih a rinawm a, chuti chunga Paris clay-a last eight a thleng thei hi hlawhtlinna tluk hialin a sawi theih awm e.
An ram runtu Russia leh an thurualpui Belarus player tawh phawt chu Svitolina hian inkhelh hma leh hnu lamah a chibai duh lo a, tihdan phung pangngai dang anga match tan hmaa thlalakdun pawh a hnial fithla zel a, round hmasa lama Russian ninth seed Daria Kasatkina a hneh tum pawh khan chibai duh loin ‘boo’ khum a lo hlawh tawh a; tunkara world number one ni chho mai thei tawh tur Australian Open champion Sabalenka a hmachhawn hma pawhin a chibai loh tur thu a sawilawk tih tarlan a ni tawh a, a tawn tur hre sa chungin a chibai duh leh ta lo reng a ni!
Quarter-final lama a tumpuinu lah chuan a chibai duh dawn lo tih hre lawk sa reng chungin chibai a han tum lui ve leh ngat a, Svitolina ngaihah chuan Belarusian khan Paris mipui kha ‘boo’ lo thei loin a siam tih loh chu har ve tak tur niin a lang!
A chhan pawh, a elpui Ukrainian-in a chibai duh dawn chuang lo tih hre lawk sa thlap Sabalenka khan chibai tum buai duh lo ting ta ni se chuan inkhel entute khan Svitolina kha an ‘boo’ zui kher lo mai thei!
Belarusian Sabalenka pawh hian tournament a hmachhawn laiin harsatna a tawk ve tho a, chanchinbumite zinga Ukraine reporter lo tel vete atangin zawhna chhan harsa tak tak tawh a nei tawh a, chuvangin post-match news conference a hmachhawn theih hnuhnung pahnih pawh a lo pumpelh phah tawh hial a, chutianga inlan chu a tan him loah a ngai tih a lo sawi tawh a ni.
Title la tura rinkai berte zinga tel chho zel kum 25 mi Sabalenka hian last four lamah Karolina Muchova a tum leh ang.
Kum 26 mi unseeded Czech Muchova hian a vawikhatna atana French Open semi-final chuangkai turin quarter-final match pakhata a tumpui Anastasia Pavlyuchenkova lakah 7-5 6-2 hnehna a chang a, 2021 Australian Open last four match pakhat zawka Jennifer Brady a hneh loh kha tunhma lama Grand Slam semi-final a thlen awmchhun niin, kuminah Roland Garros-a final lo khel ve tawh Russian Pavlyuchenkova hnehin a career-a a vawihnihna atan grand slam last four a lut ve leh ta a ni.
Pavyluchenkova hian nikum khan a khup tinain, world ranking lamah pawh tlahniam duai tawhin, 333-na daih a luah a; kum 2021 khan Roland Garros-ah hian final khel ve tawhin, Barbora Krejcikova a hneh lo.