Al-Ittihad tana khel tur Benzema

Saudi Arabian club Al-Ittihad chuan Real Madrid atanga kalbo ve ta Karim Benzema an chang dawn tih a chiang ta a, French striker hian sum tam tham tak nena Saudi champion sawmna a pawm fel tawh a, kumin December thlaah a club thar thuam inbel chung hian Fifa Club World Cup a khel ang.
Ballon d’Or winner Benzema hian Arab club nena kum thum daih contract ziah a remti a, ti hian, Real Madrid-a khelhpui thin leh Saudi club dang Al-Nassr tana khel mek Cristiano Ronaldo nen league thuhmunah an khel leh dawn tihna a ni.
Kum 35 mi Benzema chuan, “Ka kalna tur hi league tha tak niin, player tha tak tak an tam a, Saudi Arabia ramin a chimchin a kham sang zel tih min kawhhmuhtu leh ka thian ni bawk Cristiano Ronaldo pawh a awm a; he hmun hi Europe-a ka tih thin ang bawk khan hnehna chang tura pan ka ni,” a ti.
French striker Benzema hian kum 14 Real tana a khelh chhung khan trophy 25 la tlingin, chu’ng zingah chuan Champions League panga leh La Liga pali a tel a, Bernabeu club tan inelna hrang hrangah game 648 atangin goal 354 a thun tling a, Cristiano Ronaldo (450) chiah tluk loh a nei.
Benzema club thar Al-Ittihad manager hi Wolves leh Tottenham boss hlui Nuno Espirito Santo kha a ni.
PSG chhuahsan tur Messi pawh Saudi club dang Al-Hilal nen sawizawm mek a ni a, Messi, Ronaldo leh Benzema-te’n he league an luahho a nih ngat chuan league ngaihven hlawh a ni lo thei lo ang.