A vaia lak kan inring bik lo
– ZPM president
Lunglei Municipal Council inthlana seat awm zawng zawng lak an inbeisei bik lo tih Zoram People’s Movement president Lalliansawta chuan a sawi a. MLA inthlanah nghawng a neih a ring tih a sawi.
The Aizawl Post-in a biaknaah ZPM president chuan LMC inthlan atang hian, kan ram dinhmun thlirin mipuiin ram siamthat duh tak tak hruaitu an duh nia a lan thu sawiin, “Kalphung thar – mipui sawrkar han enchhin an duh ve tawh a ni ang tih a ngaih bel loh theih loh,” a ti.
Party lian pahnihten ram an lo hruai tawh lai karah ZPM an lo inzep ve tak si ah chuan, mipuiin enchhin an duh ve ta nia an hriat thu leh lawmawm an tih thu a sawi a. Lunglei boruak chu MLA inthlanpui nen inzawmna a neiin an ring tih a sawi. “Party thar kan ni a, mipui thlir mek lai kan nihna lai a awm. Hetianga Lunglei mipuiin rinna nghata min thlang ta hi Zoram mipuiah pawh nghawng a neih ngei kan ring a, kan beisei bawk,” a ti.
LMC ward 11 lak vek chu an beisei ngam lo tih Lalliansawta hian sawiin, “Kan sawihonaah chuan sawrkarna kan lak theih mai kan inbeisei viau a, a vaia lak chu kan sawi ri lem lo khawp mai,” a ti.
An chak chhan chu Pathian tanpuina a ni tih an ring nghet thlap a; a dawtah chuan an party thawhrimna nia a ngaih thu ZPM hruaitu hian a sawi. “Party dangte chetdan chipchiar chu kan hriatpui loa, keini chu kan thawkrim a ni. Kan bei ngawrh khawp mai a, kan thawhrimna hi Lalpa’n mal a sawm niin kan chhuizawn lo thei lo, a thawkrim ber kan ni ang,” a ti.
Pathian leh mipui zarah ZPM-in hun chhinchhiah tlak leh hun ropui tak a chang chu lawmawm a tih thu a sawi a. Thahnemngai taka thawktute chungah lawmthu a sawi a, mipui beiseina ti thlawn lo turin LMC councillor thlantharte leh party mite a chah nghal tih a sawi a ni.
A vaia lak kan inring bik lo – ZPM president
Get real time updates directly on you device, subscribe now.