A ZIAH AWM RENG A ZIAK

Zoliansanga Tlau

Rev. Dr. Zairema kha March 4, 1917 khan Champhai Hmunhmeltha khuaah a piang a. Kum 1940 khan Cotton College Gauhati-ah BSc (Chemistry) Honours a zir zo va. Kum 1954 khan Serampore Thelogical College-ah BD First Class-ah pass lehin, a hnuah D.D leh, D.Litt degree-te a dawng bawk.
Rev. Zairema thuziah khungkhawmna ‘Thukhawchang Mi Pekte Hi’ tih lehkhabu kum 2009-a an tih chhuah, ‘Endikpuitu Thuhma’-ah chuan “Rev. Zairema hian kum 1940 vel atang khan Articles leh Essays a ziak tan niin a lang a” tiin Revd Chuauthuama’n a ziak a. Kum 1940 vela a thuziahte chu ‘Zun’, ‘A no ber no ber mai’, ‘Thu khuh’-te hi an ni. A thuziah dah khawmna tho ‘Lekhabu Te Pasarih’ tih lehkhabu kum 2009- a an chhuahah Revd Chuauthuama’n (Enpuitu Thuhma) “Rev. Zairema hi a hun tawngin a zir lo a ni ang, khati khawpa mi thiam chhuanawm ni se, lehkhabu a ziak tam lem lo. A lehkhabu ziak tih tham deuh chu MSSU Puitling Sunday School zirlaibu pahnih, Marka Hrilhfiahna (1970) leh Johana Hrilhfiahna (1974) te kha an ni a. Chubakah chuan ‘Genesis Thlan Chhuah Hrilhfiahna’ (1957) a ziak bawk. Kum 2003-ah khan a lehkhabu pakhat ‘Kan Bible Hi’ tih chu tihchhuah a ni a. ‘Book of the Year 2003’ atan Mizo Academy of Letters-in a thlang nghe nghe a nih kha” (p. v) tiin a ziak a. “Rev. Zairema lehkhabu ziah hmasak ber chu ‘Bilat Lei Hnathawh Dan’ (1957) hi a ni awm e. He lehkhabu a ziah avang hian a ziaktu ngei pawhin deuhsawh a hlawh phah deuh a, ‘Mizo BD pass hmasa ber lehkahbu hmasa ber chu ‘Bilat lei hnathawh dan’ tih mai mai a ni a’ tih a ni thin.” tiin a ziak bawk a. ‘Lekhabu Te Pasarih’ tih lehkhabu vek kum 2011-a an tihchhuah lehah pawh Revd Chuauthuama’n (Enpuitu Thuhma) ‘Bilat Lei Hnathawh Dan’ hi mi thenkhatin Rev. Zairema dem nan leh fiamthu thawh nan tun thlenga an hman thin ni mah se, Mizo fate a hmangaih avanga a ziak a ni a” tiin a ziak leh bawk.
A chunga kan tarlan thuziak atang khian Rev. Zairema hian kum 1940 vel atangin Articles leh Essays a ziak tan a. Kum 1957-a a lehkhabu ziahte chu: ‘Bilat Lei Hnathawh Dan’ tih leh ‘Genesis Thlan Chhuah Hrilhfiahna’ tihte a ni a. Heng pahnih zingah hian ‘Bilat Lei Hnathawh Dan’ tih hi a ziak hmasa zawk niin alang.
Rev. Zairema khan kum 1945-a BD a zawh hnu khan Synod-ah a thawk nghal a. A hun chanve chu Mizo High School lama inhmang tura ruat a ni bawk. A hnua zela a hnathawh pawimawh tak tak tarlan tur awm nual mah se, tun tuma kan sawi tum ber a nih loh avangin sawi duah lo mai ila a tha ang e. BSc leh BD degree nei Synod-a lut nghal ni bawk chu kum 1957-a ‘Bilat Lei Hnathawh Dan’ tih lehkhabu a ziah chu mite’n nuihsawhin an deuhsawh a ni awm e. A degree neih BD chauh ngaihtuah a, Synod-a thawk bawk si chu hetianga mite deuhsawh a tawk ta mai pawh kha a awm ve tho tih theih a ni ang. Mahse, ani Science zir, Bsc-ah pawh thilchawhpawlh dan leh thil eng emawa a chemical content zira hria, Chemistry honour ngat a ni tih hre tan erawh deuhsawha nuihzat chu sawi loh a ziah awm reng a ziak a ni tih tur zawk a ni. Revd Chuauthuama’n “…a ziaktu ziah chhan chu khatih lai hunah khan thingtlangah Project Office lam atangin tuikhur/tuikhuah siamna tur pawisa an sanction tan tawh a. Mahse tuikhur/tuikhuah an siam chu tha aram sawi tur a awm loh avangin Rev. Zairema hian Mizo mipuite a hmangaih avangin he lehkhabu te tak te hi a ziak ta a ni. He lehkhabuin a sawi ang taka tuikhur siam chu a chhe ve mai mai lo” (Lehkhabu Te pasarih, 2009, 2011, p.iv) tiin a ziak bawk. Pathian rawngbawltute zingah pawh khawtlang leh ram hmasawnna veia au chhuak thin leh thuziakmi sawi tur an awm nual mai. Rev. Zairema’n ‘Chinchang Hre loho’ tih thupui hmanga a thuziakah pawh “BSc kan zir lai khan cement a khal (set) chungchang formulae te nen kan zir a, exam zawhnaah a lo tel kher a, ka chhang thei a, a chemical process (a inkhaidiat dan) chu ka hre tawh lo, mahse, cement a lo chang ta hi a chhan ka theihnghilh tawh lo ang” (Thukhawchang Mi Pekte Hi, 2009, p. 297) tiin a ziak nghe nghe.
Mizote zinga BSc pass hmasa ber hian he hual chepna leh zim tawtna avang hian a ni mai thei, Science chungchang pawh a ziak tam lo. Mizo tawng chungchang erawh a ziak nual a. Kan vannei hle. Pathian thu bakah ‘a ziah awm reng’ Science chungchang te kha lo ziak nual se chuan, a Mizo puite hi kan vannei leh zual tur hi a nia. Tunah erawh thawhlehna nghakin a muhil tawh a. A pawi ngawt mai. Keini nung dama la awmte hi chuan kan ziah awm reng ziakin tan i han la teh ang u. A bikin kum 60 ral kai tawhte phei chu, in tawn hriat leh daih hriatte kha utawk tur vawn mai lovin Mizote hriatah puangzarin lehkhabuah han chantir teh u; thlanmuala in liam hma ngei hian hna han tan nghal teh u khai. Keini’n finna tui chu kan lo dawt dawn nia.