Aadhar nena inthlunzawm ngai hrang hrang inhrilhfiah

Unique Identification Authority of India (UIDAI) Regional office Guwahati bultumin Thawhlehni khan Aizawlah Aadhaar chungchangah state level workshop neih a ni.
Hmanpuitu DP&AR secretary R Lalramnghaka chuan kum 2016-a Aadhaar Act hman a nih hnuin India mipui chhinchhiahna, identifier pawimawh ber a ni ta a. Sawrkar hnuaia hamthatna hrang hrang an dawn theihna turin Aadhaar enrollment tih a ngai a, a tam thei ang berin enrolment an tih theih nan Aadhaar Enrollment Drive kalpui thin a ni tih a sawi. Aadhaar neitu beneficiary ten Direct Benefit Transfer (DBT) kaltlanga hamthatna leh tanpuina an dawn theih Aadhaar leh bank account thlunzawm niin, mipui pawhin tanpuina hi dik tak leh awlsam takin an dawn theih phah tih a sawi a ni.
Thupui hrang hrang hmangin Aadhaar chungchanga hriat tur pawimawh inhrilhfiah a ni a. State pawn leh state chhunga mithiam sawm bikten hun an hmang a. Zawhna awmte an chhang nghal bawk.
Tarlan danin, tunah Mizorama Aadhaar enrollment ti zawng zawng zaa 90.61 an ni a. Centrally sponsored schemes 63 chu Aadhaar kaltlanga tanpuina pek thin a ni. Empowering residents, DBT, good governance, Aadhaar Enabled Payment System (AePS), proliferation of digital financial services leh foundational layer to India Stack te Aadhaar nena inngheng leh inthlunzawm vek an ni.
Workshop-ah hian Mizoram sawrkar department hnuaia official-te bakah bank aiawhte an tel a ni.