AAP-in an duh lohna thlen

AAP Mizoram hruaitute chuan Delhi-a an party hruaitute hmu in Mizoramin Forest Conservation (Amendment) Bill 2023 an duh lohna leh hmarchhak state pum tana a that lohna an thlen.
AAP Mizoram hruaitute bakah hmarchhak state danga AAP hruaitute chuan Delhi-ah an party hruaitulu, hmarchhak bik changtute hmu in, hmarchhaka BJP hmalakna hrang hrang an sawi ho a. AAP Mizoram hruaitute pawhin Manipur buaina leh Forest Conservation Amendment Bill 2023 chu NE state tan thil tha lo tak a nih thu an sawi.
AAP hruaitute chuan Manipura buaina chhuak leh tuna hmarchhak state hmun hrang hranga buaina awm chu BJP hruaitute hmalakna ni ngeia an ngaih thu sawiin, FCA Bill 2023 an pass pawh hi tlangmite hmunawl awhna avangte, min thenhran an duh avang leh tlangmite min chimral an duh avang nia a lan thu an sawi a ni.
‘Seven Sisters’ tia hriat thin hmarchhak state chu BJP chuan thiam taka pawh darh min tum mek a, Manipur-ah chuan a hlawhtling thawkhat tawh a, a bak state dangah chuan hetiang hi a thlen an phal dawn lo a. Chumi tur chuan AAP hruaitute chuan theihtawp an chhuah zel dawn, tih AAP Mizoram thuchhuak chuan a sawi a ni.