Adam Sandler-a’n People’s Icon Award dawng dawn

Hollywood star, fiamthu thiam Adam Sandler chu 2024 People’s Choice Awards-ah People’s Icon Award hlan a ni dawn. He comedy star hi People’s Icon Award dawng thei parukna tur a ni a, Melissa McCarthy, Jeniffer Aniston, Jennifer Lopez, Halle Berry leh Ryan Reynolds ten an lo dawng tawh a ni. Issue hmasa lama tarlan tawh angin Lenny Kravitz chu Music Icon Award hlan a ni dawn bawk. Award hi February ni 18-ah sem a ni a, Barker Janger, Santa Monica, California-ah an sem dawn a, Simu Liu-a’n a host ang.
Sandler, kum 57, hi comedian, actor, writer, producer leh musician a ni a, a film channa hriat hlawh tak tak zingah Grown Ups, Happy Gilmore, The Wedding Singer, Big Daddy leh The Lingest Yard te pawh a tel a, heng film sum hmuhchhuah hi dollar tluklehdingawn 3 chuang a tling tawh bawk. Uncut Gems leh Hustle-ah pawh a lemchan thiamzia a pholang tawh a, Netflix lama a channa te pawh entu ngah pawl niin, chung zingah chuan You Are So Not Invited to My Bat Mitzvah pawh a tel.
Sandler hian People’s Choice Awards pakua a dawng tawh a, MTV Movie Award paruk leh Kid’s Choice Awards 12 a dawng tawh bawk a, 2023 khan award ngaihhlut tak Mark Twain Prize for American Humor a lo dawng tawh bawk a ni.