Adele ‘Someone Like You’-in 2B view a kai

Adele ‘Someone Like You’-in 2B view a kai
Adele hla hit ‘Someone Like You’ music video chuan YouTube-ah vawin tluklehdingawn 2 en a hlawh ta. He black & white music video, ngaihzawng te nena inthenna hla lungkuai zet maiah hian Adele hi Paris-a kawtthler rauhsan leh leihlawn velah a tei kual deuh char char, a hlu thunawnah pawh “Min ngaihtuah suh, nangmah ang chu ka tawng leh mai ang, i tan thil tha ber ka duhsak che. Min theihnghilh bik lo la aw. Ka la hre reng, a chang chuan hmangaihna hian a daih rei a, a chang chuan natna min thlen, i tih kha,” tih vel te a nih kha.
He hla hi January 2011-a a tihchhuah kha niin, a album pahnihna ’21’ atanga a single pahnihna a ni a, tunah chuan he hla hi a signature song zinga chhiar a ni tawh. Billboard Hot 100-ah pawh kar nga chhung a No.1 a nih kha. A hla awmna album ’21’ hi Adele album hit zet mai kha a ni a, Billboard 200 (albums) chart-ah pawh kar 24 chhung No.1 niin, he chart-ah hian kar 560 chhung a lang thei nghe nghe a ni.
‘Someone Like You’ hi Adele music video YouTube-a vawi tluklehdingawn 2 en hlawh thei pathumna a ni a, a music video dang ‘Rolling in the Deep’ chuan vawi tluklehdingawn 2.2 en a hlawh tawh a, ‘Hello’ pawhin vawi tluklehdingawn 3 en a hlawh tawh bawk.