YMA leh phalna nei lo hnam dang sumdawng

Pawl zinga Mizo hnam huap zo ber YMA Inkhawm Pui vawi 75-na Sakawrdaia neihah thurel ‘YMA khawih’ panga leh ‘sawrkar khawih’ pathum a awm a. ‘YMA khawih’ thurel zingah hian thurel nambar pahnihna chu “Mizoram chhunga hnam dang sumdawng, phalna nei lo tam ta lutuk hi titlem turin YMA-in hma la rawh se” tih a ni.
He thurel nambar pahnihna hi YMA hmalak theihna ni bawk mah se, ‘phalna’ tih hi a pe chhuaktu chu sawrkar a nih miau avangin leh, sawrkar dan bawhchhiatna thila hmalakna tur a nih dawn avangin, YMA-in hma a la dawn a nih pawhin, Dan kengkawhtute nen Dan behchhana kalpui tur chi a nih hmel a. Eng pawh ni se, thurel thliar hrannaah, YMA khawih a ni emaw, sawrkar khawih a ni emaw, kan ram kan hnam himna tiderthawng thei thil a nih avangin, hei hi chu urhsun tak leh khauh taka beihpui thlak ngei ngeina tur chi chu a ni phawt mai.
Hei hi Mizoramin kan buaipuina a rei tawh a; tun hnaia rel kawng a rawn luh thuk deuh tak avanga hmalakna thar a ni mai lo a, tunhma kum tam tak kal ta atanga YMA leh MZP ten an lo buaipui reng tawh kha a ni a, tunah hian a rawn hluar chho leh ta a ni mai awm e.
Kum sawm vel kaltaah khan, khatih laia MZP president pakhat chuan zep hni hne lovin hnam dang sumdawng chungchang hi a lo sawi chhuak tawh a; social media lamah pawh khel deuh laih a hlawh nghe nghe kha. MZP President-in a sawi dan chuan, “Mizorama hnam dang sumdawng 90% vel hi dan lova sumdawng an ni…” a ti.
Heti hian a sawi: “….sawrkarin hnawtchhuak se kan duh a, mahse an hnawtchhuak si lova, Mizoramah dan lova sumdawng an nih avangin ti ve deuh thin se kan duh a. Dan lova sumdawng an nih avangin an hnenah hian pawisa kan khâwn thin a, kan zêp lo, phat thu pawh a awm lo. Mi thenkhat chuan min dem tih pawh kan hria, min lo dem mai teh u, kan khawn zel dâwn, hengho hnên atanga kan pawisa lakte hi ram leh hnam rawngbawl nan hman a ni…. MZP-in kan duh ber zâwk chu, Mizoramah hian pawisa khawnna tur hnam dang hi awm lo se tih hi a ni….” tiin.
A chiang hle mai! Dan lova hnam dang sumdawng zat 90% vel tih hretu MZP nen YMA hi thawk dun thei se, awmzia a nei thui khawp ang. Tun lai tê hian, hnam dang, Assam registration lirthei hmanga bungrua chi hrang hrang thingtlang khaw lama phur kuala hnam dang sumdawng vak vel an phu sup sup mai niin sawi a ni lehnghal.
‘Checking’ hi a tha e, kan tihtur pawh a ni ang; mahse, human resource development lama tan kan lak a pawimawh tel. A ram luahtu leilung fate hian kan rama hna awmte hi keimahni ngeiin thawh tum ila, hnam dangin an rawn thawh sup sup ang hi thawk hreh lo ila, chu chu ILP checking buaia buai ai chuan buaipui manhla zawk tur a ni. He lamah hian YMA pawh hian tan a la mek a, nasa zawkin tan han la thar leh se; ILP nei lo tingmit duah duah tum aiin kan hnemhnanpui zawk ang.