Africa-in indo tihtawp ngiat

South Africa President Cyril Ramaphosa chuan Ukraine indona chu a tawp ngei a ngai tiin Russia president Vladimir Putin hnenah a sawi a.
Ramaphosa hian Putin chu St Petersburg-ah African ram hruaitu dang parukte nen an hmu a ni.
Ukrainian President Volodymyr Zelensky pawh an hmu tawh tho va, Zelensky chuan Russia-in Ukraine ram a luah chhung chuan inbiakna neih a duh loh bur thu a lo hrilh thung.
Putin chuan African leader te hnenah Ukraine chuan inbiakna neih a duh ngai lo a lo ti thung a. St Petersburg-a inbiakna neihah hian Ramaphosa chuan hruaitu pahnih te chu lung in tang te inthleng tawn tura ngenin Russia-in naupang hmun hima a dah te pawh an chenna lama thawn haw turin a ti bawk a.
Putin hi International Criminal Court chuan Ukrainian naupang te Russia in a awp Ukraine ram china awm te an nu leh pate atanga chhuhsaka hmun him tia sawia a dah avangin International Criminal Court chuan war crime thubuai a siamsak a ni.
African palai tena naupang te chu an chhungte hnena pek let leh tur tia thu a sawi laiin Putin chu lo inrawlhin “Naupangte chu khawih thiang lo an ni a, an him nan buaina hmun atangin kan la chhuak a ni,” tiin a lo sawi. UN chuan dan kalha Ukrainian naupang za tel tehmeuh Russia rama lak an nih dan finfiahna a neih thu a sawi thung.
Ramaphosa chuan indona chuan Africa-ah nghawng a neih nat tur thu sawiin diplomacy hmanga chinfel ni se a ti a.
“Indona hi tawp chin nei lovin a kal reng thei lo. Indona tin te chuan tawp hun a nei vek a ni. He indona tihtawp a nih theih nan hian kan lokal a ni” tiin a sawi.
Indona chuan Ukraine leh Russia atanga fertiliser thawnchhuah nasa takin a tibuai tia sawiin chu chuan African ram te tibuaiin khawvel pumin a tawrh phah a ti bawk a.
Putin chuan grain crisis thleng mekah Ukraine indona dem lovin khawthlang ram te a dem thung a, UN-sponsored deal ah grain export 3% chauh Black Sea kaltlangin ram rethei ber te hnenah an pe thei chauh tiin a sawi bawk.
African palai te hi South Africa, Egypt, Senegal, Congo-Brazzaville, Comoros, Zambia, leh Uganda hruaitu lawk te niin South Africa leh Uganda bik hi Russia awn deuha ngaih an ni a, Zambia leh Comoros te chu Khawthlang ram awn deuha ngaih ni thungin Egypt, Sengeal leh Congo-Brazzaville te chu neutral anga chhiar an ni thung.