Agriculture-a ram hruaitute pawimawhna

Nimin khan Kolasib-a ICAR Research Complex-ah sensitization workshop pawimawh zet mai neih a ni a. He hunah hian, sik leh sa mila ran leh thlai enkawl dan mumal zawk nei tura state thuneitute, dan duangtu leh kut hnathawktu pawl hrang hrangte thawhho pawimawhna sawi a ni a. Sik leh sa inthlak danglam chho zelin thil nung chi hrang hrangte inkungkaihna (Ecosystem) a tihchhiat chhoh mek zel avangin sik leh sa inthlak danglam chho mila thlai chin bakah boruak leh leilung tichhe lo zawnga hma lak thiam a pawimawhzia sawi a ni.
ICAR (Indian Council of Agricultural Research) hi India rama agriculture hnuaia education te, research te, kuthnathawktute kaihhruai leh thawhhona buaipuitu ‘apex body’ a ni a, India ram state tinah an inzar pharh a. Mizoramah pawh hian bu an khuarna a rei tawh hle a, mahse an tangkaina leh an pawimawhna ang hian Mizoram hian kan la chhawr tangkai thiam chiah lo niin a lang. Eng vangin maw?
A chhanna chu nimina sensitization workshop-a ICAR mithiamte thusawi atang hian a lang a tih theih awm e. ICAR mithiamten an sawi dan chuan, huan thlai buaipuitute mai ni lo, dan duangtute leh ram hruaitute thlenga hma lak a ngai a; chemical hmang loa thlai chin (organic farming) leh thil nung awmsa tichhe lo thei ang bera thlai chinte a pawimawh a, hemi kawngah hian sawrkar pawhin sum leh pai pawh sen hreh loh a pawimawh, tiin an sawi a. Sik leh sa inthlak danglamin kuthnathawktute laka harsatna lian a thlen loh nan thlai chi (variety) tha leh ran chi tha, sik leh sa inthlak danglamin a tihbuai vak loh chite chin leh vulh a pawimawh thu sawiin, department hrang hrangte leh kuthnathawktute thawhhona tha neih a pawimawh a ni, an ti.
‘A pawimawh’ tih an sawi dan ki hi chu, ‘kan la kalpui chiah loh vang’ a ni ber awm e. Tuna kuthnathawktuten thlai an chin dan hi chu, a ram leilung dinhmun endik mila thlai chin lam aiin, ram awl tawh phawtah chuan eng thlai pawh kan ching hmiah hmiah mai zel tihna a ni ber awm e. Lei al deuh te, lei thur (acidic) deuh te a lo awm a, chumi lei control tum lem lova, a awl remchang lai apianga thlai ching mai zel kan nihna hi, kan la thar hlawk theih lohna chhan te pawh a ni thei ang. Agricultural research council awpna hnuaiah hian ‘research base’ hian kan kal leh si lo lai tak hi kan insiam thatna tur chu niin a lang.