Agriculture lama hmalakna MJA-in tlawh

Agriculture lama hmalakna MJA-in tlawh
MJA Lunglei District member-te chuan sawrkar laipui enkawl Indian Council of Agricultural Research Kolasib an tlawh a, ICAR Research Complex for NEH Region head Dr S Doley chuan an hmalakna a lo hrilhfiah.
ICAR Research Complex for NEH Region-ah hian scientist 5 – Dr Lalhruaipuii, veterinary (microbiology); Dr Lungmuana (soil science); PL Lalrinsanga, aquaculture (fishery science); Y Bijen Singh (agriculture chemistry); Dr Tamilarasan K (livestock production management) te awm mekin, farmer-ten hlawk zawka an tharchhuah theihna’n training an siamsak thin a, farming leh a kaihhnawih atan an mamawh ang bungrua an pe thin.
Funding agency an nih loh avangin sum leh pai tanpuina an pe thei lo a, farmer-te harsatna tlangpui – thlai eichhetu natna hrik hmuhchhuah leh a enkawl dan, natna thlentu laka thlai venhim dan, ranvulh chungchang leh thlai chinna atan ram leilung enkawl dan an enfiah sak thin dante sawi a ni.
Lunglei MJA-te ngenna chhangin Dr S Doley chuan, kumin sawrkar kum chhungin Lungleiah farmer-te tan training buatsaih sak a tiam a; farmer-te harsatna sutkian a nih theihna’n whatsapp kaltlangin scientist-te thawn thin se, an ni hian hmalak dan tur an lo hrilh theih dawn bakah a tul chuan an hmunpui Umiam Meghalaya-ah a thawnin hma an laksak thei dawn tih a lo hrilh.
Kolasib Dumluia sawrkar project kal mek ‘Chakai Demonstration Farm’ ICAR mithiamte enpui anga sawi chungchanga zawhna chu, mumal takin ICAR-in information an dawng lo tih an sawi a. Zirchianna engmah awm loa farm anga kalpui chu a tih chi an rin loh thu an lo hrilh. ICAR scientist (aquaculture) PL Lalrinsanga chuan sawrkarin chakai farm hmalakna a kalpui takah chuan a mimal angin chakai ei duh zawngte leh biology a zir tih a sawi a, hmun hrang hrang ami chakai lakkhawma hmunkhata dah hian a lo awm hmasaten a awm hnuhnungte an beih thin avangin damchhuahna chance an nei tlem tih a sawi. Phai lama chakai farm an kalpui reng reng buh hmuna khawi chi a ni, tiin, tlangrama chakai ang chu khawi chi a ni em tih zirchianna a awm loh avangin a harsat a rinthu a sawi.
Lunglei MJA member-te hian Krishi Vigyan Kendra (KVK) Kolasib District an tlawh bawk a. Senior scientist & head Dr Michelle C Lallawmkimi hoin thawktuten lo dawngsawngin an hmalakna an lo hrilhfiah.
KVK Kolasib-ah hian Mizoram chief minister leh agriculture minister te hming la kawpa siam ‘Zorin bean’ pawh hlawhtling takin enchhin a ni a, hengte hi farmer-te hnenah a chi pe in farmer-te pawhin an hlawhtlinpui hle niin an sawi. Loneitute harsatna leh an dinhmun hre turin field-ah an tlawh thin a, tunah hian Mizorama a hmasa ber turin ar, a sa thleng dum vek chi ‘Kadakrath’ an enchhin mek bakah ar chi dang – Rainbow rooster, turkey leh guinea fowl te pawh enchhinin an vulh mek tih an sawi.
KVK Kolasib hi kum 1979-a din niin tunah India rama KVK tha zingah a tel a, NITI Aayog-in a tehnaah ‘A’ grade an pe mek.
Irrigation & Water Resources Department, Kolasib district hmalakna, Tuichhuahen ami pawh MJA member-te hian an tlawh.