By Zoremi Hmar Zote
-- Advertisement --
April ni 19, 2023 khan MZP General Headquarters bultumin MZP Conference Hall-ah zirtirtu pawl hrang hrangte nen inrawnkhawmna neih a ni a, kal khawm ten ngun taka sawiho a nih hnuin an resolution siamah ‘nu leh pa leh aia upate chunga nun dan mawi lantir’ tih hi a tel a, hei hi thil pawimawh tak a ni.
‘Technology hmasawnna social media hrang hrangin min nuai mekna karah hian, zonun ze mawi, aia upa zahna, tawngkam hawihhawmin hmun a chan zel theih nan zirlaite leh thalaiteah tan lak ho zel ni se’ an ti bawk a, hei pawh hi thil pawimawh eltiang a ni. Facebook lamah te hian kan tawngkam a nat tawhzia leh aia upa kan zah tawh lohzia chu a lang chiang hlein ka hria. Kan pi leh pu rual dawn thaw pawh ni se kan hnial/chhâng pàng páng ngam tawh a ni a, pawi tak a ni. MZP hian an titha-in, an tih tur dik tak an ti a ni. Anni berin hma an lak chuan aia upa zah kawngah leh zo nun ze mawi vawn nun kawngah hian thalai leh naupang zawk ten nasa takin hma kan sawn ngeiin a rinawm.
Hman lai chuan aia upate tirh an hnial ngam ngai lo va, aia upa ten an kam khat chang pawhin thiam thu sawia hnial let ngam an awm ngai lo. Aia upate hnial/chhâng ngam nih chu thil zahthlak a ni a, ‘zilh loh fa ang mai’ tiin an hmu hniam em em thin. Ruai theh emaw, chhungkaw chaw ei a ni emaw, upa berin a bàr hmaa lo bàr khalh chu thil mawi lo a ni a, an ti ngai lo a ni. An zinga upa berin a bâr hmasa a, tichuan an ei ve ngam chauh thin. Upa zawkte lo bàr khalh chu thil zahthlak leh koham nihna a ni. Hnatlan nikhuaah naupang zawkin chawlh a rawt ngai lo va, bàn an rawt ngai bawk lo va, upa zawkte zai an ngaiin, chawlh hun emaw, ban hun emaw chu upa ber kutah a awm a, a ni’n chawlh hun, bàn hun a ruat mai thin. An khawtlang inrelbawlnaah val upa te neiin, chhiat that thulhah val upain ro a rel a, tlangval naupang zawkte chu val upa thu thuin an awm mai thin. Val upa kam chhuak chu hnial thiang lova ngaih a ni a, zan thim a ni emaw, chhun enah pawh ni se zualko-a kal a tul chuan an tlan dawr dawr mai thin.
Tun lai mi chu kan vannei ta. Khawvel lo changkang chho zelah zualko-a khaw hla tak tak kal te a ngai ta lo va, Phone hmangin kan awm hmun atangin kan zualko-in engkim kan inhre pawh ta vek a, awm hmun atangin khawvel kan fang thei deuh thaw tawh hi a ni hawt mai. Mizo tlawmngaihna kawng hrang hrang zingah mitthi lu men te, khawhar in kal te erawh kan la chhawm nung zel a, zo nun ze mawi zingah chhiat tawh thu-a kan zia kan chhawm chhoh zel hi a mawi lai ber ti ila kan sawi sual awm lo ve. Khawvel a changkang tawh a, hman lai angin tlawmngaih a tulna a tam tawh lo e mah ti ila hnatlan te, khawhar in riah leh khawhar in kal te erawh kan la chhunzawm zel a, hengah hian kan zo nun ze mawi lan chhuahna tur kawng hrang hrang a la awm a ni. YMA kutah kan innghat deuh a ni ber a, YMA lam pawh hian thalaite hnenah aia upa zah a pawimawhzia te zirtir uar deuh se la, aia upa zah mai bakah kan zo nun ze mawia a mawi lai apiang inzirtir uar thar leh ila a duhawm khawp mai.
‘Zirna hmasa ber chu in chhung hi a ni’ kan ti thin a, dik pawh a dik e. Chawhlui kilhonaah pa berin a fate zirtir uar se la, kan fate, la naupang te te pawh ni se an than hnan tur khawpa zo nun ze mawi zirtir hi nu leh pate mawhphurhna a ni. A dawtah chuan sikul lama zirtirtute an pawimawh leh a; naupang hi an mak ve khawp a, nu leh pate thu ai pawh hian an zirtirtute thu hi an awih duh zawk tlat nia! Home work chungchangah pawh han zirtir ve ila, “Kan miss/Sir ten tihhian tih tur an ti…chuti chuan tih loh tur an ti,” tiin mei kawhin an tang tlat thin. Hei hian zirtirtute hlutzia, pawimawhzia a tilang chiang hle awm e. Sikul lamah tan la thar ang aw…kan naupangte hnenah aia upa zah tur leh kan zo nun ze mawi dang tlawmngaihna te, a tha zawnga huaisenna leh a dangte hi sawi uar ila, zirtir uar ila a va tha dawn teh lul em!
Naupangte hi puitling leh upa zawkte entawn chunga hringnun paidal zir ve mai an ni a, an thinlunga an vawn hlen tur, tih dan tur rêng leh kan hnam zia a ni e an tih tlat theihna tura an lu bûra hri thami, aia upa zahna hrî, Mizo tlawmngaihna vawn nunna hrî hi kan khung phawt chuan, a hlâwkna têl tur chu keimahni tho kan ni. An mahni ngeia pawh maw le; la upa ve tho dawn hlawm hek! Zo nun ze mawi an nuna a lan chhuahna thu, tu emaw tanpui ngai a tanpui avang te, tar leh upate a ngaihsakna thu te a sawiin, lo phùrpuiin lo fak thin ila, chhunzawm zel châk turin siam ang u khai.
Kan dam phawt chuan kan la upain kan la tar ve ngei ngei dawn! Kum sawm lek te hi chu a ral zung zung mai a nia aw. Kan vàng lai, kan vul lai leh chak lai ni te hian thlanghlei kâwlah mi la liamsan ve ang a, kan naupanna te hian uia chelh beh rual lohvin a tukhum chhah mi la chhàwn ve ang a, kan vun mâm nalh tak mai pawh hi tar vun vuaiin a la rawn hnehchhuh ve ngei ngei dawn a ni. Reilote-ah tar khawhar kan la ni ve ang a, kan hrisel poh leh kan tar rei dawn tihna a ni mai bawk si! Upa leh tarte kan duat a, kan ngaihsaka kan zah hian keimahni tan bawk asin tha ni. Kan hmabak, kan nun la ni ve tur kan chher a, kan hun tawng tur thawnthu kan chêtziain kan ziak mek a, kan seng tur chi kan tuh a ni tih hi hre teh mawlh ang u! Upate tan chenna khawvel nuam siam tur hian, naupang leh thalai chauhvin mawh kan phur lo ve. Puitling tawh pawh kan pawimawh hlei hlei. Khawvela kan chàm chhung chuan, keini aia upa hi an awm ngar ngar dawn! Keini aia naupang zawkte entawn turin, an mit hmuhah ngei he ze duhawm, aia upa zahna leh kan zo nun ze mawi hi lantir thin teh ang u.