Aibawk PHC endik

Aibawk PHC endik
Sawrkar damdawi in tha bik, National Quality Assurance Standards (NQAS) certification (primary health centre level) nei thei tura beiseiawm Aibawk Primary Health Centre (PHC) chuan National Level External Assessment a hmachhawn a. Endik tur hian national external assessors pahnih – Dr Arun Kumar Baruah leh Dr Debajyoti Bhattacharya te lokalin, ni hnih chhung an endik dawn a ni.
NQAS certification hi Quality Assurance Programme National Health Mission hnuaia hmalakna a ni a. Endiknaah hian department paruk – OPD, Labour room, IPD, laboratory, National Health programmes leh general administration endik a ni ang. Endik tur checkpoints hi 2000 aia tam a awm a ni.
Aibawk PHC hnuaiah hian mihring 10283, khua 8 awmin, sub centre 5 leh sub centre clinic 3 an awm a. Tunah hian medical officer Zoliankimi Ngente hoin staff nurse pali, pharmacist pakhat, health supervisor pakhat, laboratory technician pakhat, x-ray technician pakhat, Group D pathum, driver pakhat leh block account manager pakhat an awm a ni.