AIDS vanga thite hriatrengna hun hmang

Positive Women Network of Mizoram (PWNM) chuan HIV/AIDS vanga thite hriatrengna hun, International AIDS Candlelight Memorial Service chu May 29 khan Aizawlah an hmang.
Hmanpuitu Health & Family Welfare minister Lalrinpuii chuan, HIV/AIDS vanga thi ta te chu hriatreng an ni tih a sawi a. Harsatna tawk mekte pawh an lungngaihna leh manganna hriatsak an ni, tiin, damdawi leh eitur tha zawk an neih zel theihnan theihtawp chhuah zel turin kalkhawmte a chah.
Mizoram State AIDS Control Society project director Dr Jane Ralte pawhin, kohhran-in PWNM an thlawp tlat avangin lawmthu a sawi a. Tun aia nasa zawka HIV laka inven leh inenkawlna lama inzirtir a tul tih a sawi bawk.
He hunah hian mi pahnih hnenah chawimawina hlan a ni a. Integrated Counselling and Testing Centre head of department Dr Lalrempuii chu HIV kaite tana a thawh nasat avang leh Mizorama ‘quality HIV testing’ tih a nih theihnana hma a lakna avanga hlan a ni. Samaritan Society project director John Thansanga chu drug addict leh HIV kaite tan a hun pum pea a thawh that avanga hlan a ni bawk.