Aikal lak theih hun tawp…

Mizoram sawrkar hnuaia hnathawk aikal late tana sawrkarin inchinfelna hun ni 30 a bituk chu nimin khan a tawp ta a. Hemi chungchanga a kaihhnawih mawhphurtu officer-te pawh, hriattirna tihchhuah atanga ni 45 chhungin an bawhzui dan report DP&AR (Administrative Reforms Wing)-a theh lut tura hriattir lawk vek an ni bawk.
Aikal lak chungchang hi June ni 6, 2024-a Council of Ministers thukhawmin an rel kha a ni a. CoM thurel dungthul hian DP&AR(ARW) chuan June ni 19, 2024 khan Office Memorandum a tichhuak a ni.
Aikal lak chungchangah hian, a kaihhnawih thuneitute pawhin, CCS (Leave) Rules, 1972 leh, CCS (Conduct) Rules, 1964 an zawm bik lo a, aikal laktir theihna dan hi a awm lo tih sawrkar lam chuan an sawi bawk.
Aikal late inchinfelna hun pek chhunga la inchingfel hman lo or inchingfel thei lote chu dan lova chawl anga ngaih an ni dawn a, CCS (Pension) Rules, 1972 angin voluntary retirement emaw, invalid pension emaw compulsury retirement emaw hmanga chawlhtir an ni dawn a, hetianga chawlhtirnain a huam ve theih loh an awm a nih pawhin special voluntary retirement scheme siam tum a ni.
Hetih rual hian, natna khirhkhan bik, damdawia inenkawl mekte chu CCS(Leave)Rules, 1972 hmanga leave an neih ang ang pek tur a ni a. Hei hi an hmang zo a nih pawhin ‘Extraordinary Leave on Medical Ground’ pek theih a la ni ang a, mahse hei hian rule 12 of CCS (Leave)Rules, 1972-in a phal chin kum nga (5) a pel tur erawh a ni lo thung.
Aikal lak tihtawp tum hian sawrkar lo awm tawhte pawh khan an term chhungin office memorandum-te tichhuakin tan an lo la nasa ve hle tawh a, mahse tun hi kan thleng a ni a. Sawrkar thar hian chak takin hma a han la ve leh a, ‘tihtawp hlen vang vang’ tuma tan an lakna hi a hlawhtling turah ngai ila.
Heng zawng zawng buaina a lo pian chhan, a kaikuang ber kan zawng dawn a nih chuan, a kaihhnawih thuneitu (concerned controlling authorities) teah hian a tawp deuh tlatin a hriat a; an remtihna lo chuan offical-ten anmahni thuin aikal an dah ve ngawt thei awm si lova, ‘mitdelin mitdel vek a hruai’ tih zawng zawng hi kan chang zo ta ni maiin a ngaih theih a, an chungah action lak ve theih a ni ang em? tih hi zawhna awm thei te pawh a ni awm e. A kaihhnawih authorities te hian dan kalha thuneihna an lek chhan hi han sawi ve leh dawn ta se, ram hruaitu politician thenkhatte chalah hian phung a tawp mai ang em tih pawh ngaihtuah theih tak a ni bawk.