DENGUE laka kan him nan (OBSERVATION OF ANTIDENGUE MONTH)

Dr.Walter L.Sailo

Dengue hian chhungkua leh mimal thahnem tak nunphung min tibuai viau mai! Dengue natna hi virus chikhat flavivirus group a miin a thlen a ni a, Thosi chikhat (Aedes mosquitoes) dengue hrik paiin min seh atanga kai theih a ni. Dengue natna vei zawng zawng an ngaihtuahawm (serious) kher lova, a tam zawk chu hritlang khawsik anga awmin karhnih khatah a reh leh mai thin a, a then ah insawiselna tur engmah a awmloh laiin a then erawh chu damdawi ina enkawl ngai an awm bawk a, thihna hial a thleng thei a ni.
Dengue thosi hi zingkar leh tlai khawthim hma hi an harhvan hun lai ber a ni a, chuvangin hemi hunah hian thosi insehtir lo tura kan inven that hle a ngai a ni.
Dengue thosi hi tui tling awmna hlekah, entir nan, burchhia, sarang, motor ke chhia, bawlhhlawh tling khawmah te hian an tui theih zel avangin mahni in bulah tui tling awm lo turin hmalak that a ngai hle mai.
Nu naupai Dengue veiin a naute pai laiah a kaichhawng thei a, naupang hi an taksain natna a do theihna a la chak tawk loh avangin Dengue an tuar na duh bik a, chuvangin a bik takin naupangte thosi insehtir lo tura hrilh ngunin kan fate i veng tha ang u..
Dengue natna lo lanchhuah dan hi natna dang nen a inang tlangpui thei a, khawsik, luna, luakchhuak, taksa na them thum, thal thoh, vun thak te insawiselna a ni tlangpui. A thenah engmah natna langchhuak lote pawhin a awm theih a ni. A hriat theih dan (diagnosis) ber chu thisen test a ni. Screening na atan Rapid test hman a ni a, diagnosis/confirm nan ELISA test hman a ni.
Dengue vei chu pumna neiin a luak nasa a, a chau viau emaw, thawhah, tuihal huam huam, awm hle hle thei lo a nih chuan damdawi in panpui vat a tha ber.
Dengue laka kan inven theih dan tur tha ber chu thosi insehtir loh hi a nih avangin kan in leh a bul vel a thosi pian theihna tur tui tling kan tibo vek tur a ni a, thosilen zar, thosi Hlo chhit leh taksa a inchulh/hnawih kan uar tur a ni a, thosi tamna hmunah kan awm a nih chuan kawr ban tlawn leh kekawrtlawn hak, mawza bunte kan chin than a ngai a ni.
Dengue natna laka kan lo him theihnan keimahni leh kan chhungkua kan pawimawh a, thenawmte nen kan In leh a chheh vel tihfai kawngah kan inthurual a ngai a, khawtlang hruaitute thahnemngaihnain nasa takin awmzia a nei ngei ang.
Kan chhungkua, kan veng, kan tu leh fate Dengue laka venghim thei turin tun atang hian theihtawp i chhuah teh ang u, tiin kan insawm a ni e.