Aikal tihtawp avanga harsatna thleng tur sawrkarin hmu lawk – DP&AR minister
Aikal tihtawp avanga harsatna
thleng tur sawrkarin hmu lawk
– DP&AR minister
Aikal tih tawp avangin mipuiin engemawchen harsatna an tawk dawn tih chu sawrkar hotuten an hmu tlang vek a, huaisen taka a siamthat hna kalpui a ngaih avangin mipui an chhel a ngai tih DP&AR minister K Sapdanga chuan a sawi.
Thawhtannia ZPM party office-a inkhawmah ZPM hruaitu K Sapdanga hian sawrkarin a lungkham ber aikal tihbo chu thenkhatin an huphurhpuiin an tih theih an ring lo hial a, sawrkar hmalaknain department tinah aikal an neih leh neih loh zawh niin, aikal titawp tura thuchhuah siam a ni bawk a, titawp lo department an awm chuan department hotuten mawh an phur dawn, tiin a sawi.
“Aikal tih tawp avang hian mipuiin harsatna engemawchen chu kan tawk ngei dawn tih hi sawrkar hotuten an hmu tlang vek. Amaherawh huaisen taka ram siamthat hna kalpui a ngai a, mipui pawh kan chhel a ngai hle, hun a kal anga thil a la rawn inher dik mai dawn a ni,” a ti.
Sawrkar tha nei tur chuan opposition party tha neih a ngai a, sawrkar leh mipui tan malsawmna ropui tak an nih theih laiin, opposition party-te pawhin sawrkar tihbuai tum nan thu belhchian dawl lo an hmang fo erawh mipui nuihzat leh rin loh hlawh theihna a ni tih minister hian a sawi.
Ration card chungchangah chhungkaw khawsak ziaawm zawk, card var hmangtuten sawrkar atanga buhfai subsidy-a an leina man tihsannaah chhungkaw harsa zawk – card eng leh card pawl hmangtute a huam lo tih hriat a that thu a sawi a. Chhungkaw khawsak harsa zawkte tan phurrit tur a awm lo tih a sawi.
Assam lamin an duty camp bul leimin an thianfai chu eptu party lamin mipui tihthlabarin nan hmangin thu an vawrhdarh vak niin Home minister K Sapdanga hian a sawi bawk. Airport chungchangah pawh Mizoram tana tha tur zirchian a nih chauh laiin, eptu party lamin thutlukna siamfel ta ang maiin thuthang dik lo an lo vawrhdarh leh chiam mai niin a sawi bawk.
AMC Ward No.VI by election neih turah party liana an lo ngaih pahnihin party naupangte ZPM beihrawn tura ruahmanna an siam nia sawini, “An inhmu te hle niin ka hria a, an mal din ngam ta lo hi mipui mak tih an hlawh hlein ka hria,” a ti.