Ram hruaitute hi mipui hmaa sawi tam, hna thawk tlem si

Kan state hruaitute chu mipui hmaa thil sawi tam, a taka thawk tlem leh si an nih avangin mipui pawh lai laklawhah kan awm phah tih MLA Dr K Beichhua chuan a sawi.
Thawhtannia an party office-a inkhawmah BJP State Core Group member ni bawk Dr K Beichhua chuan, thufingin – thawk tam la tawng tlem rawh, a tih laiin, hun kal tawh leh vawiin thlenga kan ram hruaitute min hruai dan erawh hemi letling hlauh hi a ni, tiin, “Mipui hmaah thu kan sawi teuh teuh a, hnathawhah erawh kan thawk tlem leh thung si hi a zialo hle. Mipui hmaah thu kan sawi a, thu kan tiam a, a hnu lawkah kan ti lo kan ti leh thung si a, hei vang hian Mizoram mipui pawhin ei leh bar zawnna kawngah leh kan nitin nun phungah a ngaihna hreloin laklawh takin kan awm phah a ni,” a ti.
Kristian-ten kan pawm danah roreltute chu Pathian ruat an ni, tih a nih laiin, India Prime minister Modi chu Pathian ruatah kan pawm thei loa, sakhaw zuitu zat atanga chhutin India sawrkarah Kristian-te chu roreltu kan ni ngai dawn lo tih chu thil chiang sa leh, a tam ber Hindu sakhua zuitute chu rorelna chelhtu an ni dawn tih chu a chiang hle tih a sawi a. Sawrkar laipui chu kan mamawh engkim min petu, an telloa kal thei lo state kan nih laiin, engmah ni si loa rilru chapo taka anmahni dodal zawng leh anmahni kaltlanga malsawmna kan dawn tur hnar chu mahni intih tetna leh malsawm dawn lohna a ni tih hi hriat a tul hle tih a sawi a ni.
Tunhnaia sawrkar laipui hotute an dawrnaah Mizorama central agriculture college leh central medical dollege din an dil chu an duhsak hlea an hriat thu a sawi a. Heng lo pawh hi thil dang tam tak an thlen tih BJP MLA hian sawiin, “Kan dinhmun chiang taka kan hriat hnu ah, BJP hi a hlauhawm loh a, malsawmna kan dawn na hnar tur zawk a ni tih hi kan la hrechhuak ngei ngei dawn,” a ti.