AIR HOSTESS NEN ZANRIAH

Mahmuaka Chhakchhuak
Delhi ka kal chu thil pawimawh takah kal mah ila ka beisei loh lamah rin aiin ka cham rei a, hahchawlh pahin Pastor Qtr-ah chengin thlamuang takin hun ka hmang a. Pastor-te nupa lah an fel em em a, inthlahrunna nei hauh loin ni tin hun ka hmang a. Sik leh sa lamah erawh boruak a lum uar tan chhoh lai a niin chhun leh zanah pawh chawl loa Ceiling Fan hman ngaihna hmun a nih avangin pawn lamah erawh kan chhuak lo viau thung. Delhi khawpui hi India khawpui ber tih takah hmun pawimawh tak a niin kum 1192 AD-a Muslim lal Shahabuddina’n thuthmuna a hman hma pawh khan Delhi-ah hian Hindu lal lo awm tawhin khawpuiah an lo hman tawh bawk avangin an sulhnu tam tak hmuh tur ala awm a. Muslim lalin an awp hnua Mughal hoin kum 1526 atanga kum 1707 thlenga an luah chhungah pawh khan Delhi-ah hian sulhnu tam tak an hnutchhiah bawk a ni. Nimahsela kum 1739-a Persia lal Nadir Shah chuan lainatna tel hauh loa a rawk tak chiamah chuan thil hlu tak tak, Peacock Thorne, Kohinoor leh thil hlu dang tam takte chu a la bo ta teuh thung a. Kum 1858 atanga British sorkar chak takin India a awp pawh khan Delhi hi khawpui pawimawh takah an hmang chhunzawm zel bawkin Mizoram thlengin min rawn awp a nih kha.
Heng hmun pawimawh leh hlu tak takte hi tlawh chakawm tak tak nimahsela khawlum tak hnuaiah chuan pawn lama chhuah a phurawm loh a, Ina tawm mai mai chu a thlanawm zawk fo thin. Chutianga kan awm lai chuan nikhat chu kan Pastor chuan Phone call dawngin ‘Zanin tlaiah in inah zanriah kan rawn ei dawn’ an rawn ti a, chutianga rawn betute lah chu an hmelhriat em em mai bakah nau ang tak taka an ngaihte an niin Delhi-a kan PYD zinga Air Hostess pahnih, Andria leh Rebecca te thiandun an ni. Rawngbawltu fate an ni bawkin Kohhran bel tlat mi an ni a, chutianga Pastor Qtr-a mahni duhthu ngeia chaw rawn ei ngam an ni pawh chu an zah loh vang lam ni hauh loin an tlangnel tawh vang zawk a ni tih chu keimah ngei pawhin ka hrethiam a, lawmawm ka ti hle zawk a ni. Zan dar kua velah kan rawn thleng ang an tih avang chuan hmanhmawh vak loin keini pawh kan awm a, ruah tlemte a rawn tla nen chuan bathlarah boruak vawt zawk dawng turin thuthmun kan rem a.
Dar kua chu a ri mai a, minute tlema a pel tihah chuan anni pahnih pawh chu an rawn thleng a, eitur eng eng emaw hi an rawn kengin Birthday Cake an lo keng tel bawk a. Cake-ah chuan ‘Happy Family’ tih hi an rawn ziah tir nghal nghe nghe a ni. Anmahni lah chu an rawn nui uar uar nghal a, an tawng bawrh bawrh bawk avang chuan fiamthu titih deuhin keini pawh chuan kan lo dawngsawngin Muantei (Pastor nupui) Birthday a hnai tawh tho a, lo lawm hmasakna a ni mai alawm tiin Happy Birthday hla chu kutbeng chungin kan han sa nawk nawk zui a. Tichuan Muantei chuan Cake chu zaiin kan inbarh hawng hawng hlawm a, kan hlim hle mai. Cake ei zawhah chuan zanriah ei tur kan buatsaih nghal a, anmahni, kan mikhualte chu a che berah tangin ei an siam nghal zung zung bawk a, an tawng reng bawk avang chuan an kianga awm chu a hahdamthlak kan ti hle mai. An pahnih chuan Air Hostess an nih ve ve avangin chutianga an chet vel paha an hnathawhna chanchin sawi laite chu a bengvarthlak viau zel bawk a.
Zanriah ei lai leh eikham hnuah pawh chuan an chanchin chu zawt zelin zawhna ho deuh anga ngaih tur thlengin kan zawt a; Thlawhna chhunga mitthi an awm tawh em? Awm sela engtinnge in buaipui ang? A nih leh thlawhnaa in thlawh laiin thinrim vanga buaina thleng a awm tawh em? Gym-ah in kal thin em ni in pian hi a va nalh thei hlawm ve? Tihte chu naupang chhe zawhna awm tak tak kan zawt a. Andria hi IndiGo Flight-a thawk a niin Rebecca hi Air India Flight-a thawk a ni a, a tuk maiah Turkey leh Chicago-a thlawk tur an ni. |umkhat chu thlawhnaa an thlawh laiin kum upa deuh tawh tak hi a boral hlauh mai a, thlawhna thlawh lai chuan thil dang tih dan vak a awm theih chuan loh avangin mitthi chu seat hnung berah thuttirin puanin an khuh ringawt mai a ni awm e. An pian nalh chhan pakhat hi chu ei leh in lamah an inhrek deuh vang a ni pakhat a, an san zawng atangin a rih lam tur chin hi bituk awm ang deuhin min hrilh bawk a, an inthununna chu a tha hle mai.
A nih leh Air Hostess-ah hian tinge Mizo hi kan va tlem thin ve tia kan zawhna chu heti hian min chhang a; Air Hostess tur chuan nal taka sap tawng leh vai tawng thiam a ngai a, hei vang hian Mizorama pianga seilian tan chuan a harsa deuh em ni tih tur a ni. Mizo tam takte pawh an han tling mai thin tak nain hnathawh tak tak hunah sap tawng leh vai tawng thiam tak tak loh chuan harsatna an tawk leh tho thin a, chu chu an buaina a ni thin. Tin, exam hi a awm deuh reng a, chu chu mizo tam tak chuan an tlin thin lo bawk a ni. Full mark 100-ah Pass mark 90 a nih thin avangin taihmak a ngai em em a, mark 92 vel hmuh chu a zahthlak avangin 97 emaw tal hmuh kan tum a, kan zir vak mai thin a, chungte chu mi tam tak chuan an peih tawk lo ve bawk a ni mai thei tiin min chhang a. Mahni inthunun hneh a ngai a, hnaa inpumpek a ngaih lehzual avangin thenkhatte hi chuan an tlin lo thin niin min hrilh bawk.
Tin, hunbi neia hnathawk thin an nih avang hian hunbi ang thlap thlapa awm a ngai thin a, entirna atan naktuk zing dar 5:30-ah min rawn hruai dawn avangin zing dar 4:00 ah kan thawh ngei ngei a ngai a, intihfai leh insiam kan lo duh bawk avangin a hunbi ang thlap thlapa inpeih a ngaih thin avangin tlin lo hi an tam thin bawk a ni. Kan chawlh loh hi chuan kan buai em em reng a, hna dang thawkte aiin kan buai bik emaw tih mai turin kan awm a, chutiang chu mi tam tak tan chuan alo ninawm thin bawk si avangin thawk tak tak peih lo an awm leh thin tia an sawi chu thil pawmawm tak niin kan hria a. IndiGo-ah hian mizo sawm hnih pawh an la awm lo ni awm tak a ni a, chutiang bawkin Air India-ah pawh tlemte chauh mizo an la awm bawk. Chutianga rim taka hnathawk an nih bawk avang chuan an thlabi lawmman pawh a tha viaua hriat a ni.
Andria phei chu Shillong kan awm laia an ina kan lo chuankai ve fo thin avangin nu leh pate thuawih mi a ni tih pawh kan lo hre tawh a, sap tawng leh vai tawng pawh thiam nal tak tur niin ka hria. Delhi ni lo khawpui dangah chuan Five Star Hotel-ah an thlenna tur buatsaih lawk vek an ni thin a, Company motor-in a hruaiin a dah leh thlap thin bawk a ni. Hetiang hian kan thalai zinga Air Hostess pahnihte nen zanriah kilhona hun kan nei chu lawmawm ka ti hle mai a, sawi tawh angin hunawl hi an neih ngai meuh loh avangin an hunawl neih chhuna zanriah kan kilho a, inkawmna hun kan nei thei hi a lawmawm lehzual a ni.