Kuki hel ten inrelbawl hran ngiat dawn

Kuki insurgent group te Manipur leh Ministry of Home Affairs (MHA) te nena kum 2008-a suspension of operations (SoO) kalpui tawhtute chuan Manipur atanga inla hrangin Kuki-Zo community inrelbawlna hran neiha Union of India chhunga la awm tho an ngiat dawn tiin an hruaitu pakhat chuan a sawi.
May 3-a Manipur-a ethnic violence avanga nunna chan mi 70 chuang an tling tawh a, United Peoples’ Front (UPF) leh Kuki National Organisation (KNO) te chuan MHA aiawh A.K. Mishra nena Delhi ah inbiakna an nei mek a. Heng group te hian a hmain Manipur state-a Kukis te tena self governance model territorial council ang an lo pawm tawh a ni.
“May 3 hmaa inbiakna kan neih angah kan let leh tawh dawn lo. Kan ramri khara Manipur atanga chhuah kan duh a ni. A hma khan territorial council neihin inremna kan siam hman lek lek a ni,” tiin an leader chuan a sawi.
A hma pawhin Manipur hill district a legislator sawm te, an zinga pasarih te chu BJP MLA te chuan Home Minister Amit Shah hmuin ‘State sorkarin a veng him hlawhchham thak’ tiin seperate administration an lo ngiat tawh bawk.
March 10 khan Manipur Cabinet chuan Kuki National Army (KNA) leh Zomi Revolutionary Army (ZRA), bakah hill-based insurgent group pahnih te nena tripartite SoO agreement an siam chu an lo hnawl tawh bawk a.
March 1 khan Ministry of Home Affairs (MHA) te signatory te ni bawk chuan UPF leh KNO te nena SoO an ziah chu kum khat atan an pawtsei tawh bawk a. SoO te hi Kuki group pahnih, insurgent group 24 intelkhawmna aiawh te nen kum 2008 a siam kha a ni a. Central sorkar chuan State sorkar inhnuhdawh chuan awmzia a nei vak lo a chhan chu tripartite agreement a ni tlat a ti ve thung.
Kuldiep Singh, security adviser, Manipur government chuan thuneituten Kuki insurgent group te camp-ah security audit an neih thu sawiin a chhan ber pawh SoO kalpui lai ni siin tun hnaia hnam anga intihbuainaah ralthuam te hman nia sawi a nih vang a nih thu a sawi a. Congress party leh Kuki legislators te chuan Aarambai Tengngol, Meitei outfit te chu Manipur-a police camp atanga ralthuam lachhuakah an puh a ni.
“SoS group-ah te hian inspection kan nei a. A hma chuan ralthuam dahna kalhna te chauh enfiah a ni a, tunah chuan heng a kalhnate hi hawngin ralthuamte kan enfiah vek a. Chabi pahnih a awm a, SoO group leh Assam Rifles ten an kawl ve ve a. Camp pakhatah chuan ralthuam thenkhatte chu a tlem deuh a, mahse, chungte chu camp humhim nana cadres tena an hman a ni thei” tiin Singh chuan a sawi.
Singh chuan designated camp 14-ah SoO group hnuaiah cadre 2200 an awm a ti a. Heng mite hian thla tin mi pakhat zelah stipend Rs 6,000 an dawng a ti bawk a. KNO aiawh chuan stipend te chu a mumal lo tia sawiin a chang chuan thla 14-15 te dawn loh an nei tiin a sawi.
Singh chuan ralthuam 1,420 rukchhuah zing atangin police armoury te chuan 488 an hmu let leh tawh tiin a sawi bawk a.
“Mipuite chu heng ralthuam ruk te hi dah let leh turin kan ngen a, kan ngenna hun tiam a ral tawh a, tunah chuan crackdown neiin investigation kan kalpui dawn a ni,” tiin Singh chuan a sawi bawk.
Manipur-ah internet tihtawp a la nih reng chhan sawiin, “Mobile Internet tihnun hun a la ni lo. White list kan siam mek a, computer internet access thei te kan siam ang,” tiin Singh chuan a sawi bawk.
Manipur-ah hian hun rei tak mobile internet te tihtawpin a awm tawh a, tun hnai lawkah sorkar chuan a pawtsei leh zui a ni. Hei hi remna leh muanna awm zel nan leh tharum thawhna leh infuihpawrhna thar te a awm loh nana hmalakna tiin a sawi a.
Mobile Internet tihtawp a nih avang hian sumdawng leh mipui nawlpuite chuan tuarin harsatna nasa tak a awm phah tawh tia sawi a ni bawk.