Air India-in fuel control switch endik zo, fel lo hmu lo
Air India-in fuel control switch endik zo, fel lo hmu lo
Air India chuan invenna atan an Boeing 787 thlawhnaa fuel control switch (FCS) in-lock theihna khawl an endik chu an zo tawh a, engmah buaina a awm lo tih airline thuneituin a sawi.
India-a thlawhna thuneitu, DGCA0in kar tirah Boeing 787 leh 737 thlawhna hmang airline zawng zawngte an fuel switch locking system endik tura a tih anga endik an ni.
Endik tura tihna thupek tihchhuah hma hian Aircraft Accident Investigation Bureau (AAIB) chuan thla hmasaa Air India thlawhna tla, mi 260 an thihnaah khan he khawl hi a tlak chhan ni thei pakhat niin an chhuina hmasaah an tar lang a ni.
Air India thuneitu chuan an engineering team-in kartawpah khan an endik a, an thlawhna khalhtute pawh an be bawk tih a sawi a. “Endik zawh a ni a, engmah harsatna hmuh a awm lo,” a ti a. Boeing 787-8 thlawhnate chu Boeing-in thlak hun tur a ruahman angin FCS khawl bung pakhat, Throttle Control Module (TCM) pawh thlak vek a ni tih a sawi bawk.
FCS hi thlawhna khawlpui bera tuialhthei pek luh thununtu a ni a. AAIB-in phek 15-a chhah thlawhna tla an chhuina report an tihchhuahah Boeing 787-8 tlaah khan a fuel switch hi an thlawh chhuah hnu rei lo teah ‘off’ nia a lan thu an tar lang a, hei vang hian a khawlpui pahnih kha a thi ta niin an tar lang bawk.
“Cockpit voice recording-ah pawh a khalhtu pakhat zawk khan engvanga off nge a nih a zawt a, pakhat khan a tih a nih loh thuin a chhang,” tiin report-ah hian tar lan a ni.
US Federal Aviation Administration-in Special Airworthiness Information Bulletin (SAIB) a tihchhuahah chuan chhui tawhna chinah hian sawi tur an la nei tam lo tih an sawi.
Tih dan tur zam sa angin Air India chuan an pilot-te chu inringa an thlawhna khalhah eng emaw sawisel ngai awm an hmuh zeuh chuan sawi chhuak zung zung turin an chah tih thuneitu chuan a sawi.
Hetih lai hian Nilaini khan International Air Transport Association (IATA) chuan AAIB-in an chhui tawh chin an tihchhuah chu a hlawm tha a, miin an beisei aia tam an tar lang tih an sawi a. IATA hi airline 340 awmna niin Air India pawh a tel.