Luman Rs. nuai 55 man chhiar Maoist hotu inpe
Luman Rs. nuai 55 man chhiar Maoist hotu inpe
Maoist state committee member pakhat, a luman pawh Rs. nuai 55 zet chhiar lai, Sukru-a chu Kandhamal district-a police hnenah AK-47 rifle nen a inpe tih Odisha DGP YB Khurania-a chuan Thawhlehni khan a sawi a. Maoist zingah commander lawk inpe thar ber a ni.
A rual hian Maoist dang pali pawhin ralthuam an pe a, hei hi police-te chuan state chhunga Maoist thiltih tihtawp tura hmalakna kalpui mekte tichaktu lian tak niin an sawi.
Malkangiri district-a piang, Sukru-a hi Odisha-a Maoist-a la tel zinga a senior ber nia hriat a ni a. Khuarania-a chuan tun hnaiah Kandhamal-ah Chhattisgarh atanga mi 13 hruaiin Maoist hmalakna chhunzawm zel turin pawl thar, ‘Eighth Company’ tih a kalpui niin a sawi.
Thuneitute chuan Sukru-a hian thuneitute hnena Maoist hel an inpe chu a duh lo niin an sawi a. January thla khan a junior, Anwesh, divisional committee member leh military platoon commander inpe duh chu a that nia sawi a ni.
Anwesh-a ruang hi a thawhpuite puihnain ramngaw chhungah phum a ni a, Shila-a leh Jogesh-a te pawh an tel a. A hnuah Jogesh-a zawk hi February 22-a venhim hna thawktute nen an inbeihnaah a thi a ni.
Police-te chuan Sukru-a inpek chhan hi Maoist dodalna beihna nasa tak kalpui vang niin an sawi a. A khawsakna vel – Kandhamal, Rayagada leh Kalahandi district intawh khawmna ramngaw zau tak thlengin drone leh hnuchhuituten an thlithlai reng niin an sawi.
Sujru-a hi ram chhunga Maoist awm lohna tura hmalakna chak zawka kalpui mek laiin a ni a. Chief Minister Mohan Charan Majhi-a chuan Thawhlehni khan assembly session-ah Odisha-ah Maoist 15 chauh an awm tawh tih a sawi a, an awmna hi Kandhamal, Kalahandi leh Rayagada district-a ramri-ah chauh a ni tawh tih a sawi bawk a. Kum hnih kalta chhung khan Maoist leh hel 96 an inpe tawh tih a sawi bawk.
Tun hnaia inpe zingah hian March 11-a Sanu Pottam-a kaihhruai Maoist 10 leh March 15-a Nakul-a kaihhruai mi dang 11 inpe pawh an tel a. Thuneitute chuan Sukru-a inpekna hian a la awmte chu March 31-a Odisha-in Maoist awm lohna nih a tumna kawngah thuneitute hnena inpekna leh chhawldawmna an pek thin hmang tangkai turin a fuih ngei an beisei thu an sawi.