Airport enkawl dan chhuichian an hlau – CLP leader

Congress Legislature Party (CLP) leader Zodintluanga Ralte chuan Lengpui Airport enkawl a nih dan chu MNF sawrkarin chhuichian a hlau hle tih a sawi.
Assembly Session neih mekah private member resolution ‘Ramdang zin mite leh ram chhung zin mite tana harsatna siam a, bungraw nawrna trolley tam tak hmanga tichhetu hi hrem ngei ni se, trolley an tihchhiat zawng zawngte hi thla khat chhungin a tharin thlak vek rawh se’ tih chu Congress MLA Zodintluanga Ralte hian pulutin, February 17 khan House-a sawiho turin a chhuak a, sawiho hman a ni lo.
A resolution sawiho hman a nih loh chungchangah CLP leader hian thuchhuah a siam a. MNF MLA-te chu a resolution sawiho an hlauh avanga amendment bill sawikual lui vak vakah a puh.
2022 March 10 tlaiah Lengpui Airport-a baggage make-up area siamthat mek a chim tawh thu leh a contractor chu chief minister Pu Zoramthanga fachuam Kamrul-a (KR Construction) a nih thu Zodintluanga hian sawiin, “Hetiang taka hna tha lo avanga a chim lai hian MNF sawrkar chuan a chim chhan a zirchiang duh miah lo,” a ti.
Congress Thalai-in Lokayukta-a thubuai an thehluh thu leh Lokayukta hian CBI chhui tura thutlukna a siam laiin, kum hnih liam hnuah pawh CBI kohluh an la ni lo tih sawiin, “MNF sawrkar hian Aviation Wing leh Lengpui Airport an enkawl dan hi chhuichian hi an hlau hle niin a lang,” a ti.
Lengpui Airport siamthat hna thawktuten khualzinte bungraw nawr kualna trolley chu cement, iron rod leh bungraw hrang hrang thiarna’n an hmang mai mai niin Congress MLA hian a sawi a. Official lam atangin an khap ngam lo tih sawiin, “A phena awm ram hruaitu lal tak hi an hlau niin a lang,” a ti.