Aizawl bawlhhlawh khawn leh sawngbawl dan sawipui

Solid Waste Management Centre Tuirial enkawl kaihhnawih sawrkar department hotute chu Thawhtanni khan larsap Indra Sena Reddy Nallu chuan a kawm.
Larsap chuan hmasawnna kawng zawh tur chuan mahni dinhmun hriatchian hmasak a ngai tih sawiin, Aizawl chu khawpui fai taka siam tur chuan bawlhhlawh sawngbawlna hmun dinhmun hriatchian a tul a. Chumi tur chuan thawktuten an tlawh tam a tul a, dinhmun ang ang pawm hmasak a ngai, tiin, Solid Waste Management Centre chu Aizawl leh a chhehvel khua tana faina lama hmasawnna thlentu a nih theih nan a chhunga awmsa bawlhhlawh sawngbawlna khawl hrang hrang chu hna thawk theia siam a pawimawh tih a sawi.
Thutkhawmah hian SWMC Tuiriala Bio-medical Waste Management Centre kalpui dan tur, awmze nei zawka vermi-compost unit kalpui dan tur leh khawtlang hruaitute kaltlanga chhungkaw tinah bawlhhlawh thliarhran inzirtir dan tur an sawiho a ni.
SWMC Tuirial hi UD&PA department hnuaia State Investment Programme Management and Implementation Unit (SIPMIU) hmalaknaa North East Capital Cities Development Implementation Programme (NERCCDIP) hmanga sak niin, kum 2019 khan hawn a ni a, kum 2022 khan Aizawl Municipal Corporation kutahhlan a ni.
AMC tarlan danin, Aizawl hnawm sakhat hi Pathianni tih loh, kartluana phurhluha sawngbawl thin a ni a, hemi tur hian AMC chuan thawktu 35 a ruai. Nitin hnawm paih truck 190 velin bawlhhlawh ton 119.42 vel SWMC-ah hian an chhungkhawm a; heng zinga ton 89.09 hi bawlhhlawh tawihthei (wet waste) niin, a dang ton 30.33 hi bawlhhlawh tawih thei lo (dry waste) a ni. Hengte hi sawngbawl niin, nitin dry waste ton 7.98 vel hi hmannawn (recycle) leh theih turin AMC pawmpui scrap dealer 11 hnen ah hralh thin. Wet waste-te hi Mechanical Compost Plant hmangin kumin March atang khan leithaah chantir zel a ni.