Aizawl bawlhhlawh sawngbawlna hmun Assembly speaker-in tlawh

Mizoram Legislative Assembly speaker Lalbiakzama chuan Aizawl khawpui bawlhhlawh paihna hmun, Solid Waste Management Center Tuirial chu Thawhtanni khan a tlawh a; AMC-in a enkawl mek dan leh bawlhhlawh khawnkhawm a buaipui zui dan enfiahin, tih changtlunna tura hmalak dan kawng AMC hotute a sawipui.
Speaker hi Municipal commissioner Er. Lalhriatpuia, executive engineer Er Lalmuanpuia deputy Municipal commissioner K. Vanlalruata ten lo dawngsawngin, AMC hotute hian bawlhhlawh tawihthei leh tawihthei lo a hranga paih a, mumal leh awmze nei taka sawngbawl a nih dan, bawlhhlawh tawihthei chu zaah za sawngbawl a nih thu leh bawlhhlawh tawihthei atanga leitha siamchhuah chu tha taka kalpui a nih dan hi an lo kawhhmuh a. Khawl hmanga chak zawka hna thawh theih dan tur an sawipui bawk.
AMC hotute hian bawlhhlawh thliarhran that loh avanga harsatna an tawh dan speaker hi kawhhmuhin, bawlhhlawh thliarhran thatin chak zawk leh awmze nei zawka bawlhhlawh sawngbawl zui theihna tura nghawng a neih dan tur sawiho a ni. Bawlhhlawh atanga thil hlu – metal, plastic, lehkha adt. lakkhawm a nih dan leh tangkai zawka hman leh tura company-a thawnchhuah a nih dan an hrilhfiah.
Heng bakah hian SWMC Tuirial tihchangtlun nana AMC-in ruahmanna a siam dan sawi ho a ni a. Speaker hian Aizawl khawpui bawlhhlawh sawngbawl kawnga theihtawpa AMC puih a tum thu leh mamawh an neih pawh a hnena thlen ngam turin a chah a ni.