Aizawl Day hmang tan

Aizawl Day hmang tan
Aizawl Municipal Corporation huaihawtin Thawhlehni atang khan Aizawl Day hman tan a ni a, Ningani thleng a awh ang.
Aizawl Day lawm tur hawngtu Aizawl mayor Lalrinenga Sailo chuan Aizawl khawpui hi 1890 February 25 atang khan mei mit loa luah lum nia chhinchhiah a ni tih a sawi a. Aizawl Day lawmna hi Aizawl Mihlun Thlahten kut atangin anmahni bengvarna in kum 2023 khan AMC chuan an kutah a la tih a sawi a ni.
Kumin Aizawl Day hmannaah basketball-a ward inelna – Mayor’s Cup bakah college quiz inelna, faina lama thawk tha chawimawina, hotel leh restaurant fai thlan leh chawimawina, AMC chungchang documentary tawi insiamsiak, mahni kutkawih eizawnna hmangtuten man chawi loa an thiamthil leh thilsiam an phochhuaha an hralh theihna tur stall ngaihtuah a ni tih a sawi.
Mayor chuan Aizawl mipui bakah Mizoram mipuiin Aizawl Municipal Corporation a hmelhriat tharna atan leh a hriatchian lehzualna atan an hnathawh leh hmalakna an ngaihhlut leh hmachhawp tarlanna atan tiin, hengte hi a sawi a. Faina leh thianghlimna lama hmalakna, bawlhhlawh sawngbawl kawnga hmalakna, awmze nei leh mumal zawka in sak leh lei laih a nih theihna atana khuahkhirhna kalpui dan leh thil danga AMC hmalakna a sawi a ni.
“Ram dang leh state dang hnathawh tha kan sawi thin a. Hmasawnna tha a thlenin kan awt ve a. Chhura chengkek lo tur ang maiin kan ban phak reng kha phak ve lo turah kan inngai thin. He rilru atang hian thangharh ila, mipuiin hmasawnna hi kan ta, nunphung leh inrelbawlna tha leh felfai hi kan ta, faina leh thianghlimna hi kan ta; chutiang zelin thil tha dang pawh kan ta a ni tih pawm thar ang u,” Lalrinenga Sailo hian a ti.