Aizawl Day hmang zo

Aizawl Day hmang zo
Aizawl Municipal Corporation huaihawta Sipai Lammuala Aizawl Day 2025 lawm chu Ningani khan khar a ni.
Aizawl khawpui hi 1890 February 25 atanga luah tan niin, kuminah Aizawl hian kum 135 a tling a ni. AMC buatsaih Aizawl Day lawmna Mayor’s Cup – Inter Ward Basketball Tournament (mipa) ah local council team 37 an tel a. Khatla South (Ward XIV) chuan Bungkawn (Ward XV) hnehin an champion. College quiz inelnaah college 12 atangin team 21 an tel a, pakhatna Govt. Mizoram Law College an ni. AMC Short Documentary Film (3 minutes) insiamsiaka pakhatna latu chu FC Lalchhuanawma, Bawngkawn a ni. Faina leh thianghlimna kawnga mimal hma la tha mi 78 chawimawi an ni a; hotel leh restaurant fai thlanchhuah niin hotel fai berah Ransam Hotel (Thuampui Vengthar) thlan a ni a, restaurant fai berah Donum Dei (Dawrpui Vengthar) thlan a ni.
February 25-27 inkara Aizawl Day lawm chhung hian Mizo thilsiam hrang hrang leh thildang pholanna stall leh food stall chu Sipai Lammualah hian siam a ni a. Aizawl Day concert, cosplay, naupang infiamna hmun neih leh siam a ni bawk. A kharnaah hian Aizawl deputy mayor R Thanglura’n thu a sawi a ni.