Aizawl district-ah sawrkarin sawhthing qtl 2761 a lei tawh

Aizawl district-ah sawrkarin
sawhthing qtl 2761 a lei tawh
Aizawl district-ah sawrkarin sawhthing chingtute atangin sawhthing quintal 2761.74 a lei tawh a, cheng nuai 138.087 man a ni.
District Agricultural Marketing Committee (DAMC) Aizawl buatsaihin Aizawl district-a sawhthing Secondary Collection Centre (SCC) puipate tan Ningani khan training buatsaih a ni a. DAMC Aizawl chairman, bawrhsap Er Lalhriatpuia chuan a kaihruai.
DAMC member secretary Lalengliana report danin, Aizawl district-a sawhthing leina atan sawrkar tangin procurement fund Ist instalment-ah cheng nuai 187.50 leh 2nd instalment-ah nuai 187.50, a vaiin nuai 375.00 dawn a ni tawh a. He fund atang hian nuai 138.087 man sawhthing quintal 2761.74 lei tawh niin, cheng nuai 236.913 balance a la awm.
Aizawl district-ah sawhthing quintal 26759 lei tur la awm thei tura beisei a ni. East Phaileng leh Thingsulthliah SCC-a sawhthing quintal 341.82 (185.84+155.98) chu Karnataka Spice Trading-in kg.ah Rs.20 in a chhang a, March 25 khan thawnchhuah vek tawh a ni.
Aizawl district-ah SCC 5 a awm a. SCC tinah hian a enkawltu tur president/ dhairman, secretary, accountant /manager leh coordinator ruat vek an ni. Sawhthing hralh thawhhnihnaah hian SCC tin hi mahni kea ding thei tura beisei an ni tawh dawn a. SCC enkawltu leh buaipuitute mawhphurhna leh tih tur a kimchang thei ang bera zirtir an ni.