Aizawl district-ah vawksa lam chi lakluh khap rih

African Swine Fever (ASF) darh zel tur danna atan leh mipui an him a, an fimkhur zelna atan Aizawl district magistrate chuan danin thuneihna a pek angin, Aizawl district huamchhunga mipui bakah vawk vulhtute leh vawk hmanga eizawngte zawm turin thupek hi a tichhuak.
Aizawl district-ah ram dang (foreign) leh state dang atangin vawk, vawksa leh vawksa atanga siam eitur chi reng reng lakluh khap a ni a. District dang, ASF hrilenna – infected area atangin vawk, vawksa leh vawksa atanga siam eitur lakluh a khap bawk.
Vawk damlo talh leh hralh a khap a. Vawk damlo chu dah hran thuai tura tiin, vawk thi chu bawlhhlawh paihna hmunah leh luikawr remchanga paih lo a, disinfectant nena phum bo turin a ti. Vawk in leh a vel pawh disinfect vek turikn a ti a ni.
Vawk damlo leh thi an awmin AH & Vety official-te hnena hriattir thuai turin a ti a. Aizawl district-a khua leh khua emaw veng leh veng emawa vawk inlakpawh tawn tur chu vawk hrisel tha chauh a ni tur a ni, tiin, ASF hri kai nia rinhlelh vawk damlo awmna khua/ veng atangin vawk lakluh leh lakchhuah khap tlat a ni tih a sawi bawk.
He thupek hi tih danglam a nih loh chuan, chhuah a nih atanga thla hnih chhung a huam dawn a, dan bawhchhia chu Section 223 of BNS 2023 hmangin hrem an ni dawn tih a sawi.