Aizawl East II Invitation Basketball Tournament Final Lal thar pian zan – Armed Veng Vs Chhinga Veng!

Aizawl East II Invitation Basketball Tournament Final
Lal thar pian zan – Armed Veng Vs Chhinga Veng!
Armed Veng Basketball Club buatsaih inelna chu a hmawrbawk zan kan thleng dawn ta – a thlengtu Armed Veng leh Chhinga Veng te pahnih hian Saron Vengin Aizawl East II basketball lal ram kum 6 zet (kum 2019 atanga tun inelna semi final zan thleng) an lo awp tawh chu luah tumin he veng inthenawm pahnih hi an insu dawn – buai laih leh rik luih a awm paw’n a mak lovang, semi final boruak kha theihnghilh suh!
Armed Veng 69 – 60 Armed Veng South
Armed Veng leh Armed Veng South inkhel chu sawi lawk tawh angin a tang ngang mai! Innawr sawk sawk, players intham, fans court chhunga tlan lut, match official lamin players an hnawhchhuah te a thleng vek – Armed Derby kan sawi lawk kha ni tlat hek!
Inkhel a tang em em mai kha mak i tih chuan he veng pahnihin infiamna an lak thu tak zia hi i hre lo tihna!
Veng pahnih intawm football field-ah te, Armed Veng Community Center leh Muma M/S tuala basketball practice satliah mai maiah pawh anni veng hi chu tlawm zawk hreh kha an ni a, leilung thuhmuna tuihnar inang tlan thin an lo nihna tawhna hian an thisen zunzamah chak zawk nih chaka tuihalna a pai tlat – inkhel erawh a zo a, an nui tlang bawk bawk a, chhiat thatah an intawiawm leh thei zel a nia, an danglamna hi an inanna lai a ni a, an chanchin ngaihnawm ber lai a ni bawk!
Armed Veng tan an veteran player khel thei lo tura ngaih Chpa leh Mafaka an inlan khan defense an tiphuisui. Av player Rinpuia (14 points) kut atangin ball awmze nei a chhuak hnem viau a, rawlthar rintlak Mala (24 points), Samule-a leh Omom-a (13 points) te hovin home advantage an hmang tangkai hle! An coach Dave-an a tul anga game a siksawi danglam ngam rah a lang a, an chak, an phu zawk.
Avs lamah Jona (18 points) bawk a khel tha fal leh a, player fitness tha tawk lo talent nei tha si – Zorina (12 points), Enkawla leh Hmuaka an nei hi an tuar leh thin, offense a tha – defense a zero hi a pawi! Felix-a (11 points) naupan deuhna a lang. Sarat-a, Hmuaka leh Sangsanga hi an hriam a ngai – tawnhriat an ngah ve tawk tawh tlat! Khaikhawm dawn ila, hun tawp hnaih lama buai Avs lamin an tuar zawk! Avs head Coach Kca’n a player tha Man-a awm lo pawi a ti zual ang.
Chhinga Veng 64 – Saron 54
Saron leh Chhinga Veng inkhel erawh boruak a dai ruih a, inkhel hmasa zawk angin fans an nei tha tawk lo ve ve. Saron lamin first 5 ah beisei loh player an dah lut a; Chhinga Veng lam erawh coach Mapuia’n a player-te a hrechiang a, hun tawp lamah a game plan fuh zia a lang a, an chak phah.
Saron tan hian player khel tha fal thurchhuak dawn ila, Tluanga (15 points), Dinliana (11 points) leh Mapuia (9 points) te hming lam a ngai ang; mahse, an veteran player fitness-ah an pha lo – an champion nomawi an thlauh chhanah hian fitness tha lo leh substitution fuh tawk lo hi kawh rawn loh theih a ni lo.
Chhinga Veng tan – Hriata (20 points), Peka (19 points) leh |hasanga (9 points) ten thlawptu an nei tha a, an bench player-ten an hna an tlin. Valtea, Lalrina, Vrsa leh Rca te hi ‘playing time’ an neih chuan danglamna thlen thei khawpa player tha thiau an ni. Patea leh Chama hi pressure hnuaiah an fim kak a ngai dawn.
Final thlirlawkna
Zanin dar 7:30 pm hian Armed Veng Community Center-ah final match hma in prog. hun hi hman a ni ang a, Pu B. Lalchhanzova (East II bialtu MLA) chu khuallian a ni ang.
Final match-ah hian tawiawmtu nei tha Armed Veng lam mipui an thawhchhuah that a rinawm a; Chhinga Veng lam hi champion thang Saron-in an paltlang thin an ni a, champion thawm chhuah theih hun remchang an neihah hian veng mipui an tlem lovang.
Coach tawnhriat ngah pahnih inbeihna, veng thenawm inepna, players inhlau lo tawn indona leh fans a hmuna tam zawk hamthatna – heng zawng zawng hi zanin ah kan hmu ang. A hmunah ngei aw.

Chhinga Veng Player & Coaching Staff

1. Lalrinchhana (Captain)
2. Lalpekhlua (Vice Captain)
3. Lalhriatzuala
4. Lalsangliana Fanai
5. Lalbiakdika
6. Laldintluanga
7. Marcus Lalthanchama
8. Joseph Biakremsanga
9. Joseph Lalrinsanga
10. Lalhlimpuia Ngurte
11. Vanlalfaka Hnamte
12. Gilmore C Lalthasanga
13. Jeremiah C Lalruatsanga

Coach : Joel Lalthansanga
Asst Coach : Vanlaltluanga
Manager : Henry C. Lalsiamliana

Armed Veng Player & Coaching Staff

1. Lalrinpuia Hnamte (Captain)
2. R.Lalruatfela
3. Vanchuangpuia
4. Lalthlanawma
5. Lalruattluanga
6. Samuel Lalmalsawma
7. Vl Khawngaiha
8. Lallianzuala
9. Lalruathlua Pautu
10. PB Ramdinthara
11. Lalruatsaka
12. Lalduhzuala
13. Lalthanpuia Tlau
14. B. Lalfakawma
15. Malsawmhlua

Coach : David Lalruatfela
Asst Coach : VL Malsawma
Manager : K. Laltlanhlui
Physio : Lalrinawma Hnamte