Aizawl khawpuiin tui a harsa
Tunlaiin Aizawl khawpuiah tui a harsa a, tui a haw \hat loh avangin chhungkaw engemaw zat tan chuan tui lei a ngai.PHE department-in Tlawng tui an pump a, chu chu mipui hnenah an sem thin. Tunlaiin tui an pump tam lo a, hei hian mipui a daih lo a ni ber.
PHE department hian ni khatah tui MLD (million litre per day) 30 an pump thlenin mipui hnena sem tur an nei tawkah an ngai a, April ni 1 atanga ni 29 thleng khan ni sarih chauh MLD 30 hi an pump tling.
An pump tam ber ni April ni 19-ah pawh MLD 31.51 a ni chauh a, a tlem ber ni April ni 22-ah phei kha chuan MLD 8.71 chauh an nei.
Tui an pump tlem chhanah sawi tur hrang hrang an nei; khawchhiat vang te, tui tlem vang te, tui nut vang te.
An sawi danin, April thla tir lama thli leh ruah thawkah khan kawlphetha an lakna line a chhia a, hemi siam chhung pawh hian nghawng a nei. Ni hnih khat lek an pump loh pawhin nghawng a nei rei thin an ti.
Ruah a surin tui a nu thin a, he harsatna hi kum hmasa lamah pawh an lo tawk tawh thin. Bawlhhlawh paih duhdah vang leh leivung paih vangin ruah a surin Tlawng lui hi tihfim rual loh khawpin a nu thin a, nghah a ngai thin an ti.
Tlawng tui lak hna hi Greater Aizawl Water Supply Scheme (GAWSS) Phase I leh Phase II hnuaiah an thawk a, Phase I hi Serlui-in Tlawng a fin hnua mi niin, hei hi a nu zual thin. Phase II hi chu Serlui-in Tlawng a fin hmain an pump a, a ziaawm.
Tlawngah ngau ngau bakah Serlui zawn velah bawlhhlawh paih leh leivung paih a tam a, hei hian Aizawl mipui tui tlan a tinu ta thin a ni. Hei hi tuna tui harsatna thlen chhan ber pakhat a nih thu PHE department lam chuan an sawi.
Khawl thenkhat a hlui tawh tih an sawi a, chuti chung chuan tunlai hian khawl chawlhtir lovin an pump thin tih an sawi a, April thlaa ruah a sur hma khan Tlawngah tui a tlem hman tih an sawi bawk.
May ni 1-ah khan Aizawlah tui connection nei hi mi 78975 an awm a, ni 10 chhungin connection khatah tui litre 2500 pek zel tur ni mah se chhan hrang hrang vanga tui an ngah loh avangin litre 2500 hi an phak lo. Nikum May ni 1-ah khan tui connection nei hi mi 69513 an awm.