Aizawl leh a chhehvel bial 16 ah ZPM tan chance a awm tawh lo – MNF adviser

Aizawl khawpui leh a chhehvel Assembly constituency 16-ah ZPM tan chance a awm tawh lo niin MNF adviser Er K Lalsawmvela chuan a sawi.
Thawhtanni zana Lawipu MNF Unit-in Lawipua programme a buatsaih a hmanpuinaah MNF adviser hian Aizawl leh a chhehvel bial 16-a ZPM tan chance a awm tawh loh thu hi a sawi a. “Pathian remruat hi a kal fuh zel a, kan tih ni miah si loin ZPM lamah candidate an siam atangin an tlahniam riai riai a. Mizo nationalism-in mipui thinlungah hmun a chang nasa tual tual a, June leh July thla vela ZPM a sawrkar dawn titute khan tunah chuan MNF lo chu sawrkar tur an awm lo an ti leh tawh,” a ti.
MNF a sawrkar chhungin hmalakna liantham tak tak a nei tih Er K Lalsawmvela hian a sawi. Tuikuk chungchanga buai fona thin pawh reh tawhin Tripura-ah anmahni duhdan ngeia an awm thu te; ramri buai chungchangah kum 2018-a buaina lian tak kan tawh laiin, MNF sawrkar hnuah erawh reilote chhungin Assam police-te Mizoram police-ten umdarhin, sawrkar huaisen thal thlahngam kan neih avangin kawngpuite laiin in sak a nih tawh thu te a sawi.
“Pathian remruatnain unau kan inkuahkhawm a, tunah chuan hmun hrang hranga Zohnahthlak awmte hian MNF hi a sawrkar leh lo ang tih hi an hlau a, theihtawp min chhuahpui a, Pathian leh mipui zarah kan sawrkar leh dawn,” a ti.
Adviser to Chief Minister (Technical) ni bawk Er K Lalsawmvela chuan Aizawl by-pass road siamna turah cheng vaibelchhe 500 chu India hmarchhak state insem turah zaa 40 Mizoramin kan chang dawn tih a sawi a. Lawipu BSUP tan sawrkar hotuten theihtawp an chhuah a, thlanmual thar neih thuai beisei a ni tih a sawi.