Aizawl leh Zoram tan MNF a tha ber – Lalruatkima

Aizawl leh Zoram tan
MNF a tha ber
– Lalruatkima
Aizawl leh Mizoram tan MNF an tha ber a, MNF-in AMC candidate an nei tha ber bawk niin an party hruaitu Lalruatkima chuan a sawi.
Thawhlehnia AMC Ward No. XII huamchhunga AMC inthlan atana an party mi inhmuhkhawmah MNF treasurer Lalruatkima chuan, Zofate Jerusalem – Aizawl enkawl turin nationalist party MNF an tha ber tih a sawi a. He ram leh hnam chhiat leh thata mawh la ngam MNF chu Aizawl leh Zoram tan an tha ber tih a sawi.
“MNF-in Aizawl leh Mizoram tana hmasawnna hna a thawh tawh zawng zawng thlir hian a ropui a. Hmuhnawm tham a tling. Engmah ti mang loa min puhtute dawt sawi hi a hre chiangtute chu mipui an ni. Pathian leh mipui zarah kum 2028-ah MNF a sawrkar leh dawn a, he hnam leh ram tan leh kan sakhaw tan kan beih chhunzawm zel dawn,” a ti.
AMC inthlanah MNF-in candidate an nei tha ber tih a sawi a. An candidate zingah AMC corporator/ councillor thin mi 4 awmin, Mizoram sawrkara secretary pension, sport lama India ram aiawh mekte, kohhran upa, Bial KTP leader leh YMA hruaitute, Zoram thalaite entawn leh ngaihsan rawn an awm tih a sawi.
“Party dang en hian an team a tha tawk lo hle a. AMC candidate an in set hlum kan ti lo thei lo. MNF-in AMC atan team tha tak kan din a, kan team din hi min pawmpuia Aizawl khawpui hmasawnna atan min vote pui turin mipui kan ngen a ni,” MNF treasurer hian a ti.