Inthlan kum a ni a, politics ngaihvente tan chuan inthlan hi titi a tling tawh ang. Bial thenkhatah chuan ding tur nia lang te pawh a hriat theih tawh.
Engmah a la chiang lo a, ding tura nia langte pawh ding lo leh thut thei chu an ni hlawm ang. Chutiang karah chuan Aizawl North III-a ding tur erawh a chiangah a ngaih theih.
Aizawl North III-ah hian mi eng zat nge ding dawn tih te chu tuna hriat theih thu a awm lo a, party lian pathum atanga ding tur erawh a chiang tawh nia ngaih a ni.
He bial hi Lalmuanpuia, MNF bial ni lai a ni a, ani hi MNF atanga ding leh turah ngaih a ni. Congress party atangin minister hlui, an party vice president Lal Thanzara chu ding tura ngaih a ni a, ZPM atangin an working president K Sapdanga chu ding tura ngaih a ni.
Tun hnaiah Aizawl North III-a veng pakhat Electric Veng Futsal Club te Delhi-ah Hero Fursal Championship-ah an tel a, hetah hian anni pathum hian sum an thawh thap a, Electric Branch YMA chanchinbu Tuitu-a sum thawhtute chunga lawmthu sawinaah pawh an hming a lang.
Veng mi ni lo chunga sum an thawh hian awmzia a neih ngei a rinawm tih chu politics lam ngaihvente ngaihdan a ni.
MLA ni lai Lalmuanpuia hi ding leh ngei tura ngaih a ni a, mi dang pahnihte hi party hruaitu lawk, duhthlang thei tura ngaih, mi dang ding tur leh an dinna tur chungchang thlenga thunei pha tura ngaih an nih bawk avangin, thil a inher thut a nih loh chuan he biala ding ngei tura ngaih an ni bawk.
Thu dawn danin, AAP atang pawhin Mizorama an convener Andrew Lalremkima chu he biala ding tura ngaih a ni mek a, PC leh BJP atangin thawm a la awm lo nia hriat a ni.
Aizawl North III-a ding tur chiang thawkhat
Get real time updates directly on you device, subscribe now.
Next Post