Aizawl Smart City hnuaia project

Kar kal ta Inrinnia UD&PA minister Pu K. Sapdanga’n Aizawl Smart City hnuaia project thawh mek pariat a tlawhte kha cheng vaibelchhia 152.06 (Nuai 15,206) hu a ni a.
Mipui nawlpui chhawr angkai tur chi Aizawl New Market leh Chaltlang tourist lodge tih loh project dang paruk te chu sport lam tui mite pual (sports infrastructure) a ni. Sports lamin vbch 93.59 (61.54%) an chang a, mipui nawlpui chan chu vbch 58.47 (38.46%) tihna a ni.
Kum nga liam taa khatih laia UD&PA minister Pu Tawnluia’n Pelican Crossing System (Project cost 61 lakhs) a hawn khan, Smart City Mission hnuaia Aizawl Smart City Ltd-in project a kalpui tur chu project 78 a nih thu leh; heng zinga project 33 te chu state share nena angkawpa thawh tur a nih thu a sawi a.
Heng project 78 te hi Aizawl Smart City Ltd website lamah chipchiara hmuh tur a awm mai lo niin a lang a; chuvangin, mipui nawlpui hman angkai theih tur chi project eng zatnge Aizawl Smart City hnuaiah hian awm dawn tih hriat a har a. Tuna a lan danah hi chuan, Aizawl Smart City hnuaiah hian sport lamah kan smart hle dawn tihna a nih hmel.
Hetih lai hian, tun thlenga Aizawl a la smart tawk lohna langsar zual, thil dang tam tak awm mah se, henkhat chu —electric hrui, kawngpui leh drainage system te hi a ni awm e. Electric hrui hnawk lutuk thlak nan hian hun rei tak ata tawh ABC hman tuma hmalakna hi kal tawh a ni a, hmasawnna a chak thei lo. Kawngpuiah hian engtik lai mahin Aizawl hi a la smart tak tak thei lo; a changin kawngpui a han dum ve hin tak na a, bawl thlek thluk, fur khat daih mang lo a ni deuh zel a; politician-te erawhin inbeih nan an hman angkai fu zel! Tuiluankawrah hian kan smart theih loh avangin fur a lo thlen apiangin tawrhna thlentu lian a tling hin.
Aizawl tih smart nan hian, infiamna lam emaw, mihring intihhlimna lam kaihhnawih emaw kan mamawh lo tihna ni lovin, kan mamawh hmasak ngawih ngawih lam hawi hi kan buaipui nep/chak lo zawk em aw a tih theih awm e. Himna hi Hlimna aiin ngai pawimawh (safety first, pleasure after) hmasa thiam ila, kan hlim rei zawk ngei