Zoa Tlau
-- Advertisement --
“Tunhma chuan Aizawl atangin Champhai hi darkar riat (8) tehmeuh mai tlan a ngai a, nilêng kal a ni. Hman nî lawka thihna avanga Champhai kan haw chho chu kawngpui thar; kan rama awm tura kan beisei phak reng reng lovah tlanin, darkar thum leh a chanve-ah Aizawl atangin kan thleng der mai!” tiin kawngpui siamtharah Champhai hi a hma aiin darkar li leh a chanve ngawtin a hnai tih Champhai khaw pa chuan a sawi.
Champhai chauh a ni lo a, Serchhip lam pawh kawngpui thar mawi mam takin a tuam vel a, Mizoram hmun hrang hrang chu kawngpui thar hian a chhun zeng zung tawh a nih hi. He hmasawnna hi a tha zawngin kan chhawr ang a, kan khawsak pawh a tiziaawm sawt dawn tih a lang tlang chiang hle a ni.
Kawngpui laih leh kan chhehvêla min hualtu:
‘Environment’ tih thumal hi Mizo tawngin a tlukpui thumal a tam viau lo, ‘environment’ ti ve mai ang. Kan hmasawnna kawngpui laih tirh khan a chhehvêla lui leh kawng thlang lam ‘environment’ a tichhe deuh a nih kha. Inhrilhhriatna leh ngaihdan inkalh pawh a awm phah rêng a ni.
Chutih rual rualin kan intawng harh a, mipui lam pawhin ‘awareness’ kan nei tha ta bawka kan thikthu pawh a chhe ta viau. A lawmawm lamah ngai ila, Company lam e.g. NHIDCL-te pawh hian a ram neitute min zah lo thei lo a, tunah chuan kan ramngaw leh luite tichhe em em lovin hmasawnna ruhrel kawngpui siam hi kalpui a theih ta.
NH-306 Silchar to Aizawl enga ti bik nge:
Aizawl atanga khaw chhak lam te, a ram laili leh a chhim lamte kawngpui lianin a chhun zeng zung tawh lai hian kan kawtchhuah lam ber hi hmasawnna hian a la hnungchhawn tlat mai.
National Highway 306 hi Assam leh Mizoram inpawhna kawng pawimawh ber a tih theih ang. He NH 306 hi Silchar atanga intanin Aizawl thleng a kal a. He kawng tum pawimawh ber mai tih ngam hi Four Lane-a siam hlan pawh nghahhlelhawm ber pakhat a ni ang chu.
Chutih mêk laiin, mi thenkhatin ‘environment’ tihchhiat duh loh chhuanlam kan ti dawn nge, mimal lar duh vang nge, a hriat tawh hek lo. Chhan hrang hrang vangin kawngpui siam tum chu tih pamtul tumin Court lam lam hmingte an tiri mêk zel bawk.
A hma zawnga ngawi reng; Environment Forest and Climate Change Department lam pawhin NH 306-ah hian kawngpui tihzauh dawna ruaiah harsatna an siam ta tlat a nih hi. Silchar to Aizawlah hian kawng zauh turah Forest ram tih chhiat tur mipui chuan kan hmu lo a, Forest hian ngatinge tunah tak dodalna (objection) an siam an siam mai ni?
Vairengte to Aizawl inkar hi mitthla ila, ramngaw pawh a awm tawh meuh emaw’n le. Mimal huan ram hlirin a khat tawh tih chu tlang hriat a ni ang chu. ‘Environment’ hi han chhiat phah em em tur pawh a awm hek lo. A kawhmawh bawl zawnga mi tute emaw an lo khawsak avang hian kan mumang ram kawngpui lian tha, Aizawl atanga darkar hnih bawr leka Assam thleng thei mai tur chu kan heti zo ta rih a ni e. Hetianga hmasawnna tur mimalin tihbuai hi i sim tawh ang u.
Aizawl chauh ni lo, Mizoram kawtchhuah kawngpui pawimawh, châk kan lakna, engkim kan chawk luhna hi mi ram kawngpui ang maia zau leh mam a nih thuai theih nan kawhmawh bawlte hi inhnukdawk thuai se a tha hle mai. Chu mai a la ni lo, a sorkar Department ber pawh hi Kalphung thar sawrkarah hian buaina ni lovin, awlsamna siamtu ni mawlh rawh se.
Roadside Reserve Forest a lo ni a:
Vairengte atanga Aizawl inkara kawng zauhna tur thenkhat hi Roadside Reserve Forest a lo ni a. Forest Act kalphung anga Reserved hi kalpui a ni. Amaherawhchu, Roadside Reserve Forest ni tur hian Dan an zawm kim meuh lo niin a lang, mipuite pawhin an hre hauh lo a, tuna Four Lane kal tur avang chauh hian mipuiin an hria a ni. A hre lawk chu Forest Department an ni a, anni hian dawhkanah chauh hna an thawk a ni mai em?
Supreme Court-in Mizorama Forest Area-a awm chin (area cover) Report thehlut leh turin kumin September thla chhung hun a pe a ni awm a. Hetah pawh hian a nihna ang takin Department hian a hmuna kal chilha finfiah vek tawhin, Report hi thehlut se duhthusam a ni.
Tun tumah hi chuan kum 1965-a mipui hriat loha Report siama thehluh ang mai mai ni tawh lovin, Dan ang thlapin Vairengte to Aizawl inkara in leh lo nei te, ram neite nena langtlang taka enho tawh a tul ang. Section 14-21 Mizoram Forest Act-a Reserve Forest lak turah hian kum 1965 leh kum 1997-ah khan Supreme Court-ah Report thehluh a ni tawh a, Dan mumal taka zawm awm lova dawhkan atanga siamrem mai mai niin a ngaih theih a nih kha.
Tun tumah hian kawngpui tha kan neih theihna tur a nih chuan Forest Department lam pawh hian a hmaa Notification-te pawh hi De-Notification-te pawh chhuah hial zawk se. Kan mutan tlêm te awm hi i sukiang ang u, September 2024 chhunga Report thehluh hi a felfai chuan hnam ro hlu kawngpui tha kan nei thuai dawn.