Aizawl tui lak belhna tur hawng

Aizawla cheng tan hnianghnar zawka tui thianghlim hmuh belh theih nan SIPMIU, UD&PA hmalakna ‘Augmentation of Aizawl Water Supply and Construction of 37 MLD Water Treatment Plant’ chu Thawhlehni khan deputy chief minister Tawnluia’n a hawng.
Kum tam tak Aizawl khawpui tuia chawmtu Greater Aizawl Water Supply Phase I leh II-in malkhalh leh indaih lo taka a chawm thin chu he Plant thar hian nasa takin a pui dawn tih deputy chief minister hian a sawi a. He scheme hi sawrkar hmasa atanga bul tan a nih thu leh sawrkarna inthlakah pawh chhunzawm zelin, a hlawhtlinna hmuh a ni ta chu lawmawm a tih thu a sawi.
He project hi diesel engine hmangin September 22-24 chhung khan trial run neih a ni a. State Investment Program Management and Implementing Unit (SIPMIU), UD&PA department chuan kum 2016 atang khan bul an tan a ni. GAWSS I & II khuahna thlang lam, Tlawng lui dung km.8 Mualkhang Tanhril ramah sak a ni a. Heta tang hian Laipuitlang zemlianah tui tih thianghlim sa hi pump chhoh a ni.
Nitin tui litre maktaduai 37 pump thei tura ruahman a ni a. India rama khawpui liana chengten an dawn thin ang, nitin mi pakhat tan litre 135 anga sem theih tura ruahman niin, chu chuan kum 2033 thleng mipui 445000 a chawm zo dawn a ni. SIPMIU-in khawpui chhung tuam chhuaka pipeline thar leh lian a phum tawhte, zonal tanky thar an sakte chuan tui mamawh belh hmang hian mipuiah tui sem a ti awlsam tawh dawn tih PHED hotute chuan an sawi.